બાંગ્લાદેશની ભૂતપૂર્વ PM હસીનાનો મોટો ઘટસ્ફોટ, તેમની હત્યાનું કાવતરું ઘડવામાં આવ્યું હતું

બાંગ્લાદેશ 5મી ઓગસ્ટની તારીખને એટલી સરળતાથી ભૂલી શકશે નહીં. તે સમયે શેખ હસીનાએ વડાપ્રધાન પદેથી રાજીનામું આપી દેશ છોડીને ભારત જવું પડ્યું હતું. ત્યારથી અહીં સ્થિતિ વધુ ખરાબ થઈ ગઈ છે. હિંદુઓના ઘરો અને ધંધાકીય સંસ્થાઓને નિશાન બનાવવામાં આવી રહી છે. હવે આ સમગ્ર મામલે પૂર્વ પીએમ શેખ હસીનાએ મોટો આરોપ લગાવ્યો છે. તેમનું કહેવું છે કે તેમને સત્તા પરથી હટાવવાની સાથે જ તેમની અને તેમની નાની બહેન શેખ રેહાનાની હત્યાનું કાવતરું ઘડવામાં આવ્યું હતું.

શેખ હસીનાએ શુક્રવારે રાત્રે પોતાની પાર્ટી બાંગ્લાદેશ અવામી લીગના ફેસબુક પેજ પર એક ઓડિયો સંદેશમાં આ મોટો દાવો કર્યો છે. તેણે કહ્યું, 'હું અને રેહાના બચી ગયા, અમે 20-25 મિનિટના અંતરે જ મોતથી બચી ગયા.'

શું છે મામલો?
વાસ્તવમાં, ગયા વર્ષે વિરોધ કરી રહેલા વિદ્યાર્થીઓ વિવાદાસ્પદ અનામત પ્રથા નાબૂદ કરવાની માંગ કરી રહ્યા હતા. આ અંતર્ગત વર્ષ 1971માં બાંગ્લાદેશની આઝાદી માટે લડનારા સ્વાતંત્ર્ય સેનાનીઓના પરિવારો માટે 30 ટકા સરકારી નોકરીઓ અનામત રાખવામાં આવી છે. પરંતુ, સરકારી નોકરીઓમાં અનામતના મુદ્દે શરૂ થયેલા વિરોધ પ્રદર્શને દેશભરમાં હિંસક સ્વરૂપ ધારણ કર્યું હતું. આ પછી સ્થિતિ વધુ ખરાબ થતી ગઈ અને પીએમ શેખ હસીનાએ પોતાના પદ પરથી રાજીનામું આપીને ભારત ભાગી જવું પડ્યું. આ દરમિયાન 600 થી વધુ લોકો માર્યા ગયા હતા. 76 વર્ષીય હસીનાની હકાલપટ્ટી બાદ નોબેલ પુરસ્કાર વિજેતા મોહમ્મદ યુનુસના નેતૃત્વમાં વચગાળાની સરકારની રચના કરવામાં આવી હતી.

2004માં પણ હત્યાનું કાવતરું ઘડવામાં આવ્યું હતું
ઉલ્લેખનીય છે કે શેખ હસીનાની સુરક્ષા ખૂબ જ ચુસ્ત હતી કારણ કે તે અનેક હત્યાના કાવતરામાંથી બચી ગઈ હતી. 2004 ઢાકા ગ્રેનેડ હુમલો 21 ઓગસ્ટ 2004ના રોજ બંગબંધુ એવન્યુ પર અવામી લીગ દ્વારા આયોજિત આતંકવાદ વિરોધી રેલીમાં થયો હતો. આ હુમલામાં 24 લોકોના મોત થયા હતા અને 500થી વધુ લોકો ઘાયલ થયા હતા. આ હુમલો સાંજે 5.22 કલાકે કરવામાં આવ્યો હતો જ્યારે તત્કાલીન વિપક્ષી નેતા શેખ હસીના 20,000 લોકોની ભીડને સંબોધિત કરી રહ્યા હતા. આ હુમલામાં હસીનાને કેટલીક ઈજાઓ પણ થઈ હતી.