રાષ્ટ્રપતિ, ઉપરાષ્ટ્રપતિ અને પીએમ મોદીએ મુસ્લિમ બિરાદરોને ઈદની શુભેચ્છા પાઠવી

નવી દિલ્હીઃ આજે દેશભરમાં ઈદનો તહેવાર ખૂબ જ ધામધૂમથી ઉજવવામાં આવી રહ્યો છે. રમઝાનના પવિત્ર મહિના પછી ઈદ-ઉલ-ફિત્ર ઉજવવામાં આવે છે. આ દિવસ મુસ્લિમો માટે ખાસ છે. રવિવારે દેશમાં ઈદનો ચાંદ દેખાયો હતો, ત્યારબાદ સોમવારે ઈદનો તહેવાર ખૂબ જ ધામધૂમથી ઉજવવામાં આવી રહ્યો છે. રાષ્ટ્રપતિ દ્રૌપદી મુર્મુ, ઉપરાષ્ટ્રપતિ જગદીપ ધનખડ અને વડા પ્રધાન નરેન્દ્ર મોદીએ દેશવાસીઓને ઈદની શુભેચ્છા પાઠવી છે.

રાષ્ટ્રપતિ દ્રૌપદી મુર્મુએ ઈદ-ઉલ-ફિત્રની પૂર્વ સંધ્યાએ દેશવાસીઓને શુભેચ્છા પાઠવી હતી. રાષ્ટ્રપતિએ પોતાના સંદેશમાં કહ્યું કે, ઈદ-ઉલ-ફિત્રના શુભ અવસર પર, હું બધા ભારતીયોને, ખાસ કરીને ભારત અને વિદેશમાં રહેતા આપણા મુસ્લિમ ભાઈઓ અને બહેનોને મારી શુભકામનાઓ પાઠવું છું.

ઉપરાષ્ટ્રપતિ જગદીપ ધનખડે પણ દેશવાસીઓને ઈદ-ઉલ-ફિત્રની શુભેચ્છા પાઠવી હતી. તેમણે કહ્યું કે ઈદ-ઉલ-ફિત્રના શુભ અવસર પર, હું આપણા દેશના તમામ નાગરિકોને હૃદયપૂર્વક શુભેચ્છાઓ પાઠવું છું. ઈદનો આ તહેવાર આપણને યાદ અપાવે છે કે સાંસ્કૃતિક વિવિધતા અને એકતા આપણી શક્તિનું કેન્દ્ર છે. આ તહેવાર ફક્ત ઉજવણી નથી, પરંતુ આપણા વૈવિધ્યસભર લોકશાહીના બંધારણીય આદર્શો જેમ કે એકતા, કરુણા અને પરસ્પર આદરનું પ્રતીક છે.

પ્રધાનમંત્રી નરેન્દ્ર મોદીએ સોમવારે લોકોને ઈદ-ઉલ-ફિત્રની શુભેચ્છા પાઠવી હતી અને આશા વ્યક્ત કરી હતી કે આ તહેવાર સમાજમાં આશા, સંવાદિતા અને દયાની ભાવના ફેલાવશે. રવિવારે સાંજે દિલ્હી સહિત દેશના ઘણા ભાગોમાં ઈદ-ઉલ-ફિત્રનો ચાંદ જોવા સાથે રમઝાન મહિનો સમાપ્ત થયો અને સોમવારે દેશભરમાં ઈદની ઉજવણી કરવામાં આવી રહી છે. સોશિયલ મીડિયા પ્લેટફોર્મ 'X' પર એક પોસ્ટમાં, પ્રધાનમંત્રીએ લખ્યું, "ઈદ-ઉલ-ફિત્રની હાર્દિક શુભેચ્છાઓ. આ તહેવાર આપણા સમાજમાં આશા, સંવાદિતા અને દયાની ભાવનાને વધારે. આ તહેવાર તમારા બધા પ્રયત્નોમાં ખુશી અને સફળતા લાવે.