હવે ચોમાસાની ઋતુમાં પણ નક્સલવાદીઓ સામે કાર્યવાહી ચાલુ રહેશેઃ અમિત શાહ

નવી દિલ્હીઃ કેન્દ્રીય ગૃહમંત્રી અમિત શાહે જણાવ્યું હતું કે નક્સલવાદીઓ સામેની ઝુંબેશ ચોમાસામાં પણ ચાલુ રહેશે અને તેમને સૂવા દેવામાં આવશે નહીં. તેમણે માઓવાદીઓ સાથે કોઈપણ પ્રકારની વાતચીતને નકારી કાઢી અને તેમને શસ્ત્રો મૂકીને વિકાસની યાત્રામાં જોડાવા વિનંતી કરી હતી. ગૃહમંત્રી છત્તીસગઢના નવા રાયપુર અટલ નગર ખાતે રાષ્ટ્રીય ફોરેન્સિક સાયન્સ યુનિવર્સિટી (NFSU) કેમ્પસ અને સેન્ટ્રલ ફોરેન્સિક લેબોરેટરીનો શિલાન્યાસ કર્યા પછી એક કાર્યક્રમને સંબોધિત કરી રહ્યા હતા.

ગૃહમંત્રી અમિત શાહે કહ્યું, "દરેક વખતે નક્સલવાદીઓ ચોમાસાની ઋતુમાં થોડો આરામ કરતા હતા (કારણ કે ગાઢ જંગલની અંદર વહેતી નદીઓ અને નાળા નક્સલ વિરોધી કામગીરીમાં અવરોધ ઉભો કરે છે), પરંતુ આ વખતે, અમે તેમને ચોમાસા દરમિયાન સૂવા નહીં દઈએ અને અમે 31 માર્ચના લક્ષ્યને પ્રાપ્ત કરવા માટે આગળ વધીશું. "તેમણે કહ્યું કે તેઓ નક્સલવાદના માર્ગે ચાલનારા ગેરમાર્ગે દોરાયેલા યુવાનોને શસ્ત્રો છોડી દેવાની અપીલ કરે છે.

કેન્દ્રીય ગૃહમંત્રીએ કહ્યું, "વિષ્ણુદેવ સાંઈએ ખૂબ જ આકર્ષક શરણાગતિ નીતિ બનાવી છે, હથિયારો નીચે મૂકો અને નવા છત્તીસગઢની વિકાસ યાત્રામાં જોડાઓ. તમને શરણાગતિ સ્વીકારવાનો આનાથી સારો મોકો ક્યારેય નહીં મળે. કોઈ વાતચીતની જરૂર નથી, સરકાર પર વિશ્વાસ કરો, હથિયારો નીચે મૂકો અને મુખ્ય પ્રવાહમાં જોડાઓ અને તમે છત્તીસગઢની વિકાસ યાત્રામાં આપોઆપ જોડાઈ જશો."

તેમણે કહ્યું, "જે લોકોએ હથિયારો નીચે મૂક્યા છે તેમને સામાજિક જીવનમાં પાછા ફરવા માટે આવકારું છું અને ખાતરી આપું છું કે અમે છત્તીસગઢ સરકાર અને કેન્દ્ર સરકાર દ્વારા તમને આપેલા વચનને પૂર્ણ કરીશું અને તેનાથી પણ વધુ મદદ કરવાનો પ્રયાસ કરીશું."

તેમણે કહ્યું, ''FSL (ફોરેન્સિક સાયન્સ લેબ) ની મદદથી, ભારત થોડા વર્ષોમાં વિશ્વમાં સૌથી વધુ સજા દર ધરાવતા દેશોમાં સામેલ થશે. 160 વર્ષ જૂના વસાહતી કાયદાને નાબૂદ કર્યા પછી લાવવામાં આવેલા નવા કાયદાઓમાં, અમે ફરજિયાત બનાવ્યું છે કે સાત વર્ષથી વધુની સજાવાળા તમામ ગુનાઓ માટે, ફોરેન્સિક સાયન્સ ટીમ માટે ઘટનાસ્થળની મુલાકાત લેવી ફરજિયાત રહેશે, આ દર્શાવે છે કે આપણા દેશમાં ફોરેન્સિક વિજ્ઞાન માટે અપાર સંભાવનાઓ છે.''

કાર્યક્રમ દરમિયાન, ગૃહમંત્રી અમિત શાહે સેજબહાર વિસ્તારમાં NFSU અને I-Hub છત્તીસગઢના ટ્રાન્ઝિટ કેમ્પસનું પણ ઉદ્ઘાટન કર્યું. રાયપુર. નવા રાયપુરમાં NFSU કેમ્પસ ૧૪૫ કરોડ રૂપિયાના ખર્ચે અને CFSL ૧૨૩ કરોડ રૂપિયાના ખર્ચે બનાવવામાં આવશે. છત્તીસગઢ સરકારે સંસ્થાઓ માટે જમીન આપી છે. તેમણે કહ્યું કે NFSUનું આખું કેમ્પસ આગામી ત્રણ વર્ષમાં વિકસાવવામાં આવશે.

ગૃહમંત્રી અમિત શાહે કહ્યું, "છત્તીસગઢમાં અંબિકાપુર, બિલાસપુર, દુર્ગ અને જગદલપુરમાં ચાર પ્રાદેશિક રાજ્ય ફોરેન્સિક વિજ્ઞાન પ્રયોગશાળાઓ છે. હવે CFSL પણ સ્થાપિત કરવામાં આવશે, જે આપણી ફોજદારી ન્યાય વ્યવસ્થાને મોટી મજબૂતી આપશે. હવે કોઈને બીજા રાજ્યમાં જવાની જરૂર રહેશે નહીં અને તપાસ માટે દિલ્હી ફોરેન્સિક નમૂનાઓ મોકલવાની જરૂર રહેશે નહીં. સમગ્ર તપાસ નવા રાયપુર અટલ નગરમાં જ કરવામાં આવશે.