કંગાળ પાકિસ્તાનમાં મંત્રીઓ થશે ધનવર્ષા, પગારમાં 188 ટકાનો વધારો

પાકિસ્તાન હાલમાં ઉચ્ચ મોંઘવારી અને દેવાના સંકટમાં ફસાયેલ છે. સામાન્ય લોકો બે ટાઈમનું ભોજન મેળવવા માટે સંઘર્ષ કરી રહ્યા છે, પણ સરકાર તેના મંત્રીઓ અને અધિકારીઓના પગારમાં ભારે વધારો કરી રહી છે. તાજેતરમાં જ પાકિસ્તાનની કેબિનેટે મંત્રીઓ, રાજ્ય મંત્રીઓ અને સલાહકારોના પગારમાં 188% સુધીના વધારાને મંજૂરી આપી છે.

આ નિર્ણય બાદ હવે તેમનો માસિક પગાર 5,19,000 પાકિસ્તાની રૂપિયા થશે. આ નિર્ણય એવા સમયે લેવામાં આવ્યો છે જ્યારે પાકિસ્તાનને ઈન્ટરનેશનલ મોનેટરી ફંડ (IMF) પાસેથી લોનનો બીજો હપ્તો મળ્યો છે.

આર્થિક કટોકટી હોવા છતાં નેતાઓ પર મહેરબાની
પાકિસ્તાનની અર્થવ્યવસ્થા નાદારીની આરે છે. ફુગાવો રેકોર્ડ ઊંચાઈએ પહોંચી ગયો છે અને વિદેશી મુદ્રા ભંડાર ઝડપથી ઘટી રહ્યો છે. તાજેતરમાં IMF એ પાકિસ્તાનને $7 બિલિયન લોન પેકેજના બીજા હપ્તા તરીકે $1 બિલિયન જાહેર કર્યા હતા. પરંતુ આ આર્થિક મદદ હોવા છતાં સરકારની પ્રાથમિકતા સામાન્ય જનતાને રાહત આપવાને બદલે તેના નેતાઓ અને મંત્રીઓની સુવિધા વધારવાની હોય તેમ જણાય છે.

કેબિનેટે મંજૂરી આપી
ગઈ કાલે પાકિસ્તાનની કેબિનેટે મંત્રીઓ, રાજ્ય મંત્રીઓ અને સલાહકારોના પગારમાં 188% વધારાને લીલી ઝંડી આપી દીધી છે. આ વધારા બાદ તેમનો માસિક પગાર 5,19,000 પાકિસ્તાની રૂપિયા થઈ ગયો છે. આવું ત્યારે બન્યું છે જ્યારે પાકિસ્તાનના લોકો લોટ, ખાંડ, દૂધ, પેટ્રોલ અને વીજળીની વધતી કિંમતોથી ભારે પરેશાન છે. પ્રાથમિક જરૂરિયાતો પણ પૂરી કરવી મુશ્કેલ બની ગઈ છે, પરંતુ સરકાર પોતાના નેતાઓને વધુ સુવિધાઓ આપવામાં વ્યસ્ત છે.

સાંસદોનો પગાર પણ વધ્યો
આ પહેલીવાર નથી કે જ્યારે પાકિસ્તાન સરકારે પોતાના અધિકારીઓના પગારમાં વધારો કર્યો હોય. માત્ર બે મહિના પહેલા જ નેશનલ એસેમ્બલીની ફાઇનાન્સ કમિટીએ સાંસદો અને સેનેટરોના વેતનને ફેડરલ સેક્રેટરીઓના વેતનની સમકક્ષ બનાવવાનો પ્રસ્તાવ પસાર કર્યો હતો. સ્પીકર રાજા પરવેઝ અશરફની અધ્યક્ષતામાં સર્વસંમતિથી તેને મંજૂરી આપવામાં આવી હતી. આ સ્પષ્ટપણે દર્શાવે છે કે પાકિસ્તાન સરકારની પ્રાથમિકતા સામાન્ય જનતાને મદદ કરવાને બદલે તેના નેતાઓને સુવિધાઓ પૂરી પાડવાની છે.