હુમલા બાદ સુરક્ષા દળોની મોટી કાર્યવાહી, શોપિયા અને કુલગામમાં આતંકવાદીઓના ઘરો નષ્ટ કરવામાં આવ્યા

જમ્મુ અને કાશ્મીરના પહેલગામમાં થયેલા આતંકવાદી હુમલા બાદ સુરક્ષા દળો આતંકવાદીઓ સામે કાર્યવાહી ચાલુ રાખી રહ્યા છે. સુરક્ષા દળોએ પુલવામા, શોપિયા અને કુલગામમાં આતંકવાદીઓના ઘરો તોડી પાડ્યા છે. આતંકવાદીઓ સામે સતત કાર્યવાહી કરવામાં આવી રહી છે.

શોપિયાના છોટીપોરામાં સક્રિય લશ્કર-એ-તોયબા આતંકવાદી કમાન્ડર શાહિદ અહમદ કુટ્ટેનું ઘર સુરક્ષા દળોએ તોડી પાડ્યું હતું. શાહિદ છેલ્લા ત્રણથી ચાર વર્ષથી સક્રિય છે, અને અનેક રાષ્ટ્રવિરોધી પ્રવૃત્તિઓમાં સામેલ હતો.

શુક્રવારે રાત્રે, સુરક્ષા દળોએ કુલગામના ક્વિમોહમાં આતંકવાદી ઝાકિર ગનીનું ઘર તોડી પાડ્યું, ઝાકિર 2023 માં લશ્કરમાં જોડાયો હતો. પહેલગામ હુમલા પછી, અત્યાર સુધીમાં સુરક્ષા દળોએ કુલ પાંચ આતંકવાદીઓના ઘર તોડી પાડ્યા છે.

સુરક્ષા દળોએ આતંકવાદી એહસાન ઉલ હકનું ઘર તોડી પાડ્યું
ગઈ કાલે, પુલવામામાં સેના દ્વારા બીજા આતંકવાદીનું ઘર તોડી પાડવામાં આવ્યું હતું. સૂત્રોના જણાવ્યા અનુસાર, પુલવામામાં જૈશ-એ-મોહમ્મદના આતંકવાદી એહસાન ઉલ હકનું ઘર નષ્ટ કરી દેવામાં આવ્યું હતું. આ પહેલા સુરક્ષા દળોએ વધુ બે આતંકવાદીઓના ઘરોનો નાશ કર્યો હતો. જેમાં અનંતનાગ જિલ્લાના બિજબેહરાના ત્રાલના ગોરી વિસ્તારમાં એક આતંકવાદીના ઘરને બોમ્બથી ઉડાવી દેવામાં આવ્યું હતું, જ્યારે બીજા શંકાસ્પદના ઘરને બુલડોઝરથી તોડી પાડવામાં આવ્યું હતું. કહેવાય છે કે એહસાને 2018 માં પાકિસ્તાનમાંથી તાલીમ લીધી હતી અને તાજેતરમાં જ તે કાશ્મીર ખીણમાં ફરી પ્રવેશ્યો હતો. તે પહેલગામ હુમલાનો શંકાસ્પદ છે.

શંકાસ્પદ વસ્તુઓ દેખાતા ઘરને ઉડાવી દેવામાં આવ્યું
દક્ષિણ કાશ્મીરના ગુરીના એક ગામમાં સર્ચ ઓપરેશન દરમિયાન સુરક્ષા દળોએ એક શંકાસ્પદ આતંકવાદીના ઘર પર બોમ્બમારો કર્યો. સૂત્રોએ જણાવ્યું હતું કે ઘેરાબંધી અને સર્ચ ઓપરેશન દરમિયાન સુરક્ષા દળોએ ઘરમાં કેટલીક શંકાસ્પદ વસ્તુઓ જોઈ હતી. ખતરાને સમજીને, સુરક્ષા દળોએ સલામતી સુનિશ્ચિત કરવા માટે પીછેહઠ કરી. જોકે, પીછેહઠ પછી તરત જ એક શક્તિશાળી વિસ્ફોટ થયો જેના કારણે ઘરને ભારે નુકસાન થયું. કહેવામાં આવી રહ્યું છે કે આ ઘર પહેલગામ હુમલામાં સામેલ આતંકવાદી આદિલનું હતું.