ભારત-પાકિસ્તાન તણાવ: સાઉદી અરેબિયાના વિદેશ રાજ્યમંત્રી દિલ્હી પહોંચ્યા, એસ જયશંકર સાથે ચર્ચા કરી

નવી દિલ્હી: સાઉદી અરેબિયાના વિદેશ રાજ્યમંત્રી અદેલ અલજુબેર ભારતની અણધારી મુલાકાતે આવ્યાં છે અને ગુરુવારે તેમણે વિદેશ મંત્રી એસ જયશંકર સાથે ભારત અને પાકિસ્તાન વચ્ચેના તણાવ ઘટાડવા પર ચર્ચા કરી હતી. અલજુબેરની નવી દિલ્હી મુલાકાત એવા સમયે થઈ રહી છે જ્યારે પાકિસ્તાન અને પાકિસ્તાન અધિકૃત કાશ્મીરમાં નવ આતંકવાદી ઠેકાણાઓ પર ભારતીય સેના દ્વારા કરવામાં આવેલી સર્જિકલ સ્ટ્રાઈક પછી ભારત અને પાકિસ્તાન વચ્ચે પહેલાથી જ તણાવપૂર્ણ સંબંધો વધુ વણસી ગયા છે.

જયશંકરે સોશિયલ મીડિયા પર એક પોસ્ટમાં કહ્યું, "આજે સવારે સાઉદી અરેબિયાના વિદેશ રાજ્યમંત્રી અદેલ અલજુબેર સાથે સારી મુલાકાત થઈ." તેમણે કહ્યું, "આતંકવાદ સામે મજબૂત રીતે લડવા અંગે ભારતના દ્રષ્ટિકોણને શેર કર્યો." ભારત અને પાકિસ્તાન વચ્ચે વધી રહેલા તણાવ વચ્ચે, ઈરાનના વિદેશ પ્રધાન અબ્બાસ અરાઘચી પણ ગઈકાલે મધ્યરાત્રિની આસપાસ પૂર્વનિર્ધારિત મુલાકાત પર નવી દિલ્હી પહોંચ્યા હતા. અરાઘચી ટૂંક સમયમાં જયશંકર સાથે વ્યાપક વાતચીત કરશે. તેઓ બપોરે રાષ્ટ્રપતિ દ્રૌપદી મુર્મુને પણ મળશે.

પહેલગામ આતંકવાદી હુમલાનો બદલો લેવા માટે, ભારતીય સશસ્ત્ર દળોએ મંગળવારે મોડી રાત્રે નવ આતંકવાદી છાવણીઓ પર મિસાઇલ હુમલા કર્યા, જેમાં જૈશ-એ-મોહમ્મદ (JeM) આતંકવાદી સંગઠનના ગઢ બહાવલપુર અને લશ્કર-એ-તૈયબાના ઠેકાણા મુરીદકેનો સમાવેશ થાય છે. વિદેશ સચિવ વિક્રમ મિશ્રીએ જણાવ્યું હતું કે, 22 એપ્રિલના પહેલગામ આતંકવાદી હુમલાના ગુનેગારો અને કાવતરાખોરોને ન્યાયના કઠેડામાં લાવવા માટે ભારતે એક ક્રમબદ્ધ હુમલો કરવાનો નિર્ણય લીધો હતો કારણ કે પાકિસ્તાન દ્વારા તેના નિયંત્રણ હેઠળના વિસ્તારોમાં આતંકવાદી માળખા પર કાર્યવાહી કરવા માટે "કોઈ નક્કર કાર્યવાહી" કરવામાં આવી ન હતી.