હેમંત સોરેને વિશ્વાસનો મત જીત્યો, મતદાન દરમ્યાન ભાજપના ધારાસભ્યોએ કર્યુ વિધાનસભામાંથી વોકઆઉટ

ઝારખંડના મુખ્યમંત્રી હેમંત સોરેને સોમવારે આજે વિધાનસભામાં વિશ્વાસ મત જીત્યો. વિશ્વાસ મતની તરફેણમાં 45 મત પડ્યા હતા જ્યારે વિરોધમાં શૂન્ય મત પડ્યા હતા. મતદાન દરમિયાન ભાજપના ધારાસભ્યોએ વિધાનસભામાંથી વોકઆઉટ કર્યું હતું.

મતદાન પહેલા વિશ્વાસ પ્રસ્તાવ પર ચર્ચાનો જવાબ આપતા હેમંત સોરેને ભાજપ પર જોરદાર નિશાન સાધ્યું હતું. તેમણે કેન્દ્રીય એજન્સીઓના દુરુપયોગનો આરોપ લગાવ્યો હતો.

હેમંત સોરેનના ભાષણ દરમિયાન ભાજપના ધારાસભ્યોએ હંગામો મચાવ્યો હતો. હેમંત સોરેને કહ્યું, "તેમની પાસે ન તો વિચાર છે કે ન તો એજન્ડા." તેમની પાસે કેન્દ્રીય એજન્સીઓ છે. જો ધારાસભ્યોની સંખ્યાના અડધા પણ ભેગા થાય તો મોટી વાત ગણાય. લોકસભા ચૂંટણીએ તેમને અરિસો બતાવી દીધો છે. રાજ્યની ચૂંટણી બાકી છે. મહાગઠબંધન સાથે મળીને લડવામાં આવશે અને તેમાં પણ તેમને અરીસો બતાવવામાં આવશે. તેમનું ષડયંત્ર સફળ થવાનું નથી.

ભાજપ પર હુમલો

સોરેને કહ્યું, “હું અહીં કાયદાકીય પ્રક્રિયામાંથી પસાર થયો છું. ત્યારે મને આ ભૂમિકામાં જોઈને વિપક્ષ કેવું અનુભવે છે તે તેના વર્તનમાં દેખાય છે. તેઓ માત્ર રાજકીય લાભ મેળવવાનો પ્રયાસ કરી રહ્યા છે.

ચંપાઈ સોરેનનો ઉલ્લેખ

તેમણે કહ્યું, "હું ચંપાઈ સોરેનનો આભાર માનું છું, જેમણે નિર્ભયતાથી સરકાર ચલાવી અને સરકારને બચાવી." આ લોકો (ભાજપ) હોર્સ ટ્રેડિંગ કરતા હતા.

મહત્વપૂર્ણ છે કે હેમંત સોરેનને કથિત જમીન કૌભાંડ સંબંધિત મની લોન્ડરિંગ કેસમાં 28 જૂને ઝારખંડ હાઈકોર્ટમાંથી જામીન મળ્યા હતા. આ પછી તે જેલમાંથી બહાર આવ્યા હતા. હેમંત સોરેનની 31 જાન્યુઆરીએ ED દ્વારા ધરપકડ કરવામાં આવી હતી. EDની કસ્ટડીમાં હતા ત્યારે તેમણે મુખ્યમંત્રી પદ પરથી રાજીનામું આપ્યું હતું. આ પછી ચંપાઈ સોરેન સીએમ બન્યા હતા.