રાજસ્થાનના ચુરુમાં ફાઇટર પ્લેન ક્રેશ, બે પાયલોટના મોત

રાજસ્થાનના ચુરુ જિલ્લાના રતનગઢ શહેર નજીક ભારતીય વાયુસેના (IAF)નું એક ફાઇટર પ્લેન ક્રેશ થયું હતું. ભાનોડા ગામ નજીક આ અકસ્માતમાં બંને પાઇલટના મોત થયા હતા. અકસ્માત બાદ ઘટનાસ્થળે મોટી ભીડ એકઠી થઈ ગઈ હતી. આ પછી પોલીસ અને વહીવટીતંત્રની ટીમ પહોંચી હતી.

વાયુસેનાએ જણાવ્યું હતું કે, "રાજસ્થાનમાં ચુરુ નજીક ભારતીય વાયુસેનાનું એક જગુઆર ટ્રેનર વિમાન નિયમિત તાલીમ મિશન દરમિયાન ક્રેશ થયું હતું. આ અકસ્માતમાં બંને પાઇલટના મોત થયા છે. કોઈપણ નાગરિક સંપત્તિને કોઈ નુકસાન થયું નથી."

IAF એ કહ્યું, "ભારતીય વાયુસેના આ નુકસાનથી ખૂબ જ દુઃખી છે અને આ દુઃખની ઘડીમાં શોકગ્રસ્ત પરિવારોની સાથે ઉભી છે. અકસ્માતનું કારણ જાણવા માટે કોર્ટ ઓફ ઇન્ક્વાયરીની રચના કરવામાં આવી છે."

રાજલદેસર પોલીસ સ્ટેશનના ઇન્ચાર્જ કમલેશે જણાવ્યું હતું કે વિમાન ભાનુડા ગામના એક ખેતરમાં બપોરે લગભગ 1.25 વાગ્યે ક્રેશ થયું હતું. તેમણે કહ્યું કે અકસ્માત સ્થળ નજીક માનવ શરીરના ભાગો મળી આવ્યા છે.

અકસ્માત સ્થળ પરથી ઘણા વીડિયો સામે આવ્યા છે, જેમાં વિમાનનો કાટમાળ સળગતો અને ધુમાડો નીકળતો જોવા મળે છે. મોટી સંખ્યામાં સ્થાનિક લોકો અકસ્માત સ્થળ તરફ જઈ રહ્યા છે.

મુખ્યમંત્રીએ દુઃખ વ્યક્ત કર્યું
મુખ્યમંત્રી ભજનલાલ શર્માએ આ અકસ્માત પર દુઃખ વ્યક્ત કર્યું છે. તેમણે ટ્વિટર પર લખ્યું, "ચુરુ જિલ્લાના રતનગઢ વિસ્તારમાં ભારતીય વાયુસેનાના વિમાનના દુર્ઘટનાના દુઃખદ સમાચાર મળ્યા. ઘટના પછી તરત જ, વહીવટીતંત્ર સતર્ક થઈ ગયું છે અને અધિકારીઓને રાહત અને બચાવ કાર્ય માટે સૂચનાઓ આપવામાં આવી છે. ભગવાન મૃતકોના આત્માઓને પોતાના ચરણકમળમાં સ્થાન આપે અને શોકગ્રસ્ત પરિવારને આ અપાર દુઃખ સહન કરવાની શક્તિ આપે.