દિલ્હીની BJP સરકારે 1 લાખ કરોડ રૂપિયાનું બજેટ રજૂ કર્યું, મુખ્યમંત્રીએ ગણાવ્યું ઐતિહાસિક બજેટ

• "ભ્રષ્ટાચાર અને બિનકાર્યક્ષમતા"નો યુગ હવે સમાપ્ત થઈ ગયો: મુખ્યમંત્રી
• સરકારે મૂડી ખર્ચ બમણો કરીને રૂ. 28,000 કરોડ કરવાનો પ્રસ્તાવ મૂક્યો
• બજેટમાં વીજળી, રસ્તા, પાણી અને કનેક્ટિવિટી સહિત 10 મુખ્ય ક્ષેત્રો પર ધ્યાન કેન્દ્રિત કરાયું

નવી દિલ્હીઃ દિલ્હીના મુખ્યમંત્રી અને નાણામંત્રી રેખા ગુપ્તાએ મંગળવારે નાણાકીય વર્ષ 2025-26 માટે 1 લાખ કરોડ રૂપિયાનું બજેટ રજૂ કર્યું હતું, જે પાછલા નાણાકીય વર્ષ 2024-25ના બજેટ કરતા 31.5 ટકા વધુ છે. ગુપ્તાએ તેને "ઐતિહાસિક બજેટ" ગણાવતા જણાવ્યું હતું કે "ભ્રષ્ટાચાર અને બિનકાર્યક્ષમતા"નો યુગ હવે સમાપ્ત થઈ ગયો છે કારણ કે સરકારે મૂડી ખર્ચ બમણો કરીને રૂ. 28,000 કરોડ કરવાનો પ્રસ્તાવ મૂક્યો છે. આ વધેલો ખર્ચ રસ્તા, ગટર વ્યવસ્થા અને પાણી પુરવઠા સહિત માળખાગત વિકાસ પર ખર્ચવામાં આવશે.

બજેટમાં વીજળી, રસ્તા, પાણી અને કનેક્ટિવિટી સહિત 10 મુખ્ય ક્ષેત્રો પર ધ્યાન કેન્દ્રિત કરવામાં આવ્યું છે. દિલ્હી સરકારે દિલ્હી-રાષ્ટ્રીય રાજધાની ક્ષેત્ર (NCR) માં વધુ સારી પરિવહન કનેક્ટિવિટી માટે રૂ. 1,000 કરોડ ફાળવવાનો પણ પ્રસ્તાવ મૂક્યો છે. કલ્યાણકારી પગલાં હેઠળ પાત્ર મહિલાઓને દર મહિને રૂ. 2500 આપવા માટે રૂ. 5100 કરોડની રકમ અલગ રાખવામાં આવી છે.

આ ઉપરાંત, 'પ્રધાનમંત્રી જન આરોગ્ય યોજના' માટે 2,144 કરોડ રૂપિયા ફાળવવામાં આવ્યા છે, જેનો ઉદ્દેશ્ય રાષ્ટ્રીય રાજધાનીમાં આરોગ્ય સેવાઓને મજબૂત બનાવવાનો છે. ભારતીય જનતા પાર્ટી (ભાજપ) ની આગેવાની હેઠળની સરકારે 26 વર્ષ પછી દિલ્હીમાં બજેટ રજૂ કર્યું છે. ગયા મહિને યોજાયેલી વિધાનસભા ચૂંટણીમાં આમ આદમી પાર્ટી (AAP) ને હરાવીને પાર્ટી સત્તામાં પાછી આવી હતી.