દેશમાં કોરોનાના કેસમાં ચિંતાજનક રીતે વધારે, પોઝિટિવ કેસનો આંકડો ચાર હજાર નજીક પહોંચ્યો

નવી દિલ્હીઃ કોરોના વાયરસના પોઝિટિવ કેસની સંખ્યા ચિંતાજનક રીતે વધારો થઈ રહ્યો છે. દરમિયાન દેશમાં સક્રિય કેસોની સંખ્યા ચાર હજારની નજીક પહોંચી ગઈ છે. આરોગ્ય વિભાગના જણાવ્યા અનુસાર, દેશમાં 3758 સક્રિય કેસ હતા. જ્યારે, મૃત્યુઆંક 28 પર પહોંચી ગયો છે. દિલ્હીમાં સક્રિય કેસોની કુલ સંખ્યા 436 પર પહોંચી ગઈ છે. અહીં 61 કેસનો વધારો થયો છે. તે જ સમયે, ઉત્તર પ્રદેશમાં સક્રિય કેસ 149 પર પહોંચી ગયા છે. મહારાષ્ટ્રમાં કોવિડ 19 કેસ ઝડપથી વધી રહ્યા છે.

આરોગ્ય વિભાગના તાજેતરના અહેવાલ મુજબ, રવિવારે મહારાષ્ટ્રમાં કોરોનાના 65 નવા કેસ નોંધાયા છે. આમાંથી મુંબઈમાંથી 22, પુણેમાંથી 25, થાણેમાંથી 9, પિંપરી-ચિંચવડમાંથી 6, કોલ્હાપુરમાંથી 2 અને નાગપુરમાંથી એક કેસ નોંધાયા છે. જોકે, રાહતના સમાચાર એ છે કે રાજ્યમાં 300 દર્દીઓ સ્વસ્થ પણ થયા છે. હાલમાં, સક્રિય કોવિડ-19 દર્દીઓની કુલ સંખ્યા 506 છે.

રાજસ્થાનમાં પણ કોરોનાના કેસ સતત વધી રહ્યા છે. છેલ્લા 24 કલાકમાં 20 નવા કેસ નોંધાયા છે. નવા કેસોમાં 17 રાજધાની જયપુરના છે અને એક ઉદયપુર, બિકાનેર અને ડુંગરપુરના છે. નવા ચેપગ્રસ્તોમાં 74 અને 82 વર્ષના બે વૃદ્ધોનો પણ સમાવેશ થાય છે. આ ઉપરાંત 19 થી 30 વર્ષની વયના 7 યુવાનોનો પણ સમાવેશ થાય છે. 20 નવા કેસ સહિત, રાજસ્થાનમાં અત્યાર સુધીમાં 98 લોકો કોરોનાથી સંક્રમિત થયા છે. આ ચેપગ્રસ્તોમાંથી એકનું મોત થયું છે. 15 દર્દીઓની હોસ્પિટલમાં સારવાર ચાલી રહી છે.

રાજધાની દિલ્હીમાં કુલ સક્રિય કેસ 436 છે. અહીં 3 લોકોએ પણ કોવિડને કારણે જીવ ગુમાવ્યા છે. ગુજરાતમાં 320 સક્રિય કેસ છે. અહીં કોરોનાને કારણે એક વ્યક્તિનું મોત થયું છે. હરિયાણામાં 30 સક્રિય કેસ છે. ઉત્તર પ્રદેશમાં 149 અને પશ્ચિમ બંગાળમાં 287 સક્રિય કેસ છે. યુપીમાં કોવિડને કારણે બે લોકોના મોત થયા છે. તમિલનાડુમાં 199 સક્રિય કોવિડ કેસ છે. દેશમાં કોવિડને કારણે જીવ ગુમાવનારા લોકોની કુલ સંખ્યા 28 પર પહોંચી ગઈ છે.