નાગપુર હિંસાની આગમાં બાંગ્લાદેશનું ઘી રેડાયું, ભડકાઉ પોસ્ટમાં લખ્યું- આ કંઈ નથી, વધુ દંગા થશે

નાગપુરમાં ફાટી નીકળેલી હિંસા પહેલા અને પછી સોશિયલ મીડિયા પર ભડકાઉ પોસ્ટ કરનારાઓ સામે નાગપુર પોલીસનું સાયબર સેલ કાર્યવાહી કરી રહ્યું છે. આવા ઘણા એકાઉન્ટ્સની ઓળખ કરવામાં આવી રહી છે અને તેમની સામે કાર્યવાહી પણ કરવામાં આવી રહી છે.
બુધવાર સુધી 6 એફઆઈઆર નોંધવામાં આવી હતી પરંતુ હવે તેમની સંખ્યા વધીને 10 થઈ ગઈ છે. સોશિયલ મીડિયા પર વાંધાજનક વીડિયો પોસ્ટ કરવા, ભડકાવવા અને ઉશ્કેરણી કરવાના મામલામાં નવી 4 એફઆઈઆર નોંધવામાં આવી છે. નાગપુર પોલીસના સાયબર સેલે બાંગ્લાદેશથી સંચાલિત ફેસબુક એકાઉન્ટની પણ ઓળખ કરી છે, જેણે નાગપુરમાં મોટા પાયે રમખાણો ભડકાવવાની ધમકી આપી હતી.

આ ખતરનાક પોસ્ટ એક બાંગ્લાદેશી યુઝરે કરી હતી, જેમાં તેણે લખ્યું હતું કે સોમવારના તોફાનો માત્ર એક નાની ઘટના હતી અને ભવિષ્યમાં આનાથી મોટા તોફાનો થશે. તપાસમાં જાણવા મળ્યું કે આ એકાઉન્ટ ઓપરેટ કરનાર વ્યક્તિ બાંગ્લાદેશનો રહેવાસી છે અને તેણે આ મેસેજ બાંગ્લાદેશથી પોસ્ટ કર્યો હતો. સાયબર સેલે ફેસબુકને આ એકાઉન્ટ બ્લોક કરવાની વિનંતી કરી છે.

સોશિયલ મીડિયા પર અફવાઓ
સોશિયલ મીડિયાનો ઉપયોગ નફરત ફેલાવવા માટે જ નથી થઈ રહ્યો પરંતુ તેના દ્વારા અફવાઓ પણ ફેલાવવામાં આવી રહી છે. છેલ્લા બે દિવસમાં, ઘણી પોસ્ટમાં દાવો કરવામાં આવ્યો છે કે રમખાણોમાં ઘાયલ બે લોકોનું હોસ્પિટલમાં મૃત્યુ થયું છે. જો કે, આ માહિતી સંપૂર્ણપણે ખોટી છે.

સાયબર સેલે અત્યાર સુધીમાં આવી 97 પોસ્ટની ઓળખ કરી છે જે ખોટી માહિતી ફેલાવી રહી હતી. સાયબર સેલે લોકોને અપીલ કરી છે કે તેઓ સોશિયલ મીડિયા પરની કોઈપણ વણચકાસાયેલ માહિતી પર વિશ્વાસ ન કરે અને અફવાઓ ફેલાવવાનું ટાળે.

200ની ઓળખ થઈ, 90ની ધરપકડ
નાગપુર શહેર પોલીસે હિંસામાં સામેલ લોકોની ધરપકડ કરવા અને તેમની ઓળખ કરવા માટે 18 વિશેષ તપાસ ટીમો (SIT) ની રચના કરી છે. અત્યાર સુધીમાં, પોલીસે 200 લોકોની ઓળખ કરી છે અને અન્ય 1,000 શંકાસ્પદોની ઓળખ કરવામાં વ્યસ્ત છે.
આ શકમંદો હિંસા દરમિયાન CCTV ફૂટેજમાં કેદ થયા હતા. આ ફૂટેજ અને અન્ય પુરાવાના આધારે પોલીસની વિશેષ ટીમો ટૂંક સમયમાં આરોપીઓની ધરપકડ કરવાનો પ્રયાસ કરી રહી છે. અત્યાર સુધીમાં 90 લોકોની ધરપકડ કરવામાં આવી છે. તમને જણાવી દઈએ કે નાગપુર હિંસા બાદ બે દિવસ માટે કર્ફ્યુ છે. ગુરુવારે સુરક્ષા સમીક્ષા કર્યા બાદ કર્ફ્યુમાં રાહત આપવામાં આવી શકે છે.