વેસ્ટઈન્ટીઝના ખેલાડી નિકોલસ પૂરને માત્ર 29 વર્ષની ઉંમરે આંતરરાષ્ટ્રીય ક્રિકેટમાંથી નિવૃત્તિ લીધી

વેસ્ટ ઇન્ડીઝના વિકેટકીપર-બેટ્સમેન નિકોલસ પૂરને આંતરરાષ્ટ્રીય ક્રિકેટમાંથી નિવૃત્તિની જાહેરાત કરી છે. પૂરનના અચાનક નિર્ણયથી તેના ચાહકો આશ્ચર્યચકિત થયા છે. ICCએ મંગળવારે આ વાતની પુષ્ટિ કરી હતી. થોડા દિવસો પહેલા જ દક્ષિણ આફ્રિકાના વિકેટકીપર-બેટ્સમેન હેનરિક ક્લાસેને આંતરરાષ્ટ્રીય ક્રિકેટમાંથી નિવૃત્તિની જાહેરાત કરી હતી, ત્યારબાદ બીજા એક પ્રખ્યાત વિકેટકીપર-બેટ્સમેનની નિવૃત્તિએ ક્રિકેટ પ્રેમીઓને ચોંકાવી દીધા હતા.નિવૃત્તિની જાહેરાત કરતા, 29 વર્ષીય નિકોલસ પૂરને તેના ઇન્સ્ટાગ્રામ પર લખ્યું, "ઘણા વિચાર અને વિચાર-વિમર્શ પછી, મેં આંતરરાષ્ટ્રીય ક્રિકેટમાંથી નિવૃત્તિની જાહેરાત કરી છે. આ રમત જેને આપણે પ્રેમ કરીએ છીએ તેણે ઘણું આપ્યું છે અને આપતી રહેશે. મરૂન જર્સી પહેરીને, રાષ્ટ્રગીત માટે ઉભા રહીને, અને જ્યારે પણ હું મેદાન પર પગ મૂકું છું ત્યારે મારું સર્વસ્વ આપી દઉં છું... તે મારા માટે શું અર્થ રાખે છે તે શબ્દોમાં વ્યક્ત કરવું મુશ્કેલ છે. ટીમનો કેપ્ટન બનવું એ એક વિશેષાધિકાર છે જેને હું હંમેશા મારા હૃદયની નજીક રાખીશ." તેમણે આગળ લખ્યું, "ચાહકોનો - તમારા અતૂટ પ્રેમ બદલ આભાર. તમે મુશ્કેલ સમયમાં મને સાથ આપ્યો અને સારી ક્ષણોને ખૂબ જ ઉત્સાહથી ઉજવી. મારા પરિવાર, મિત્રો અને સાથી ખેલાડીઓનો, હું મને સાથ આપવા બદલ આભાર કહેવા માંગુ છું. તમારા વિશ્વાસ અને સમર્થનથી મને આ બધામાંથી બહાર નીકળવામાં મદદ મળી." નિકોલસ પૂરને 2014ના અંડર-19 મેન્સ ક્રિકેટ વર્લ્ડ કપમાં વેસ્ટ ઈન્ડિઝનું પ્રતિનિધિત્વ કર્યું, જેના બે વર્ષ પછી તેને T20 ફોર્મેટમાં સિનિયર ટીમ માટે આંતરરાષ્ટ્રીય ક્રિકેટમાં પ્રવેશ કરવાની તક મળી. આ પછી, પૂરને 2018માં ODI ફોર્મેટમાં પ્રવેશ કર્યો. તેના શાનદાર પ્રદર્શનને જોતા, આ ડાબા હાથના ખેલાડીને 2019ના વર્લ્ડ કપ માટે ટીમમાં તક મળી.

વર્ષ 2021માં, પૂરન મેન્સ T20 વર્લ્ડ કપ માટે કેરેબિયન ટીમનો ઉપ-કેપ્ટન બન્યો અને વર્ષ 2022માં, તેણે બંને 'વ્હાઇટ બોલ ફોર્મેટ'માં કેપ્ટનશીપ સંભાળી હતી. નિકોલસ પૂરને વેસ્ટ ઇન્ડિઝ માટે ફક્ત 'વ્હાઇટ બોલ ક્રિકેટ' રમ્યો.61 વનડેમાં, પૂરણે 39.66 ની સરેરાશથી 1983 રન બનાવ્યા છે. આ દરમિયાન, પૂરણે ત્રણ સદી અને 11 અડધી સદી ફટકારી છે.106 ટી 20 મેચોમાં, આ ખેલાડીએ 13 અડધી સદીની મદદથી 2275 રન બનાવ્યા છે. આ ફોર્મેટમાં તેની સરેરાશ 26.14 હતી.