ઉત્તરપ્રદેશઃ બાળકી ઉપર બળાત્કાર ગુજારનાર આરોપી પોલીસ એન્કાઉન્ટરમાં ઠાર મરાયો

લખનૌ : ઉત્તર પ્રદેશની રાજધાની લખનૌના આલમબાગ વિસ્તારમાં અઢી વર્ષની બાળકી પર બળાત્કાર ગુજારનાર આરોપી શુક્રવારે પોલીસ સાથેના એન્કાઉન્ટરમાં ઠાર મરાયો હતો. તેના પર 1 લાખ રૂપિયાનું ઈનામ પણ જાહેર કરવામાં આવ્યું હતું. ડેપ્યુટી કમિશનર ઓફ પોલીસ (સેન્ટ્રલ ઝોન) આશિષ શ્રીવાસ્તવે જણાવ્યું હતું કે અઢી વર્ષની બાળકી પર બળાત્કાર ગુજારનાર આરોપી દીપક વર્મા શુક્રવારે વહેલી સવારે આલમબાગ વિસ્તારમાં પોલીસ સાથેના એન્કાઉન્ટરમાં ઠાર મરાયો છે.

તેમણે કહ્યું કે એક દંપતીએ ગુરુવારે આલમબાગ પોલીસ સ્ટેશનમાં ફરિયાદ નોંધાવી હતી કે તેમની અઢી વર્ષની પુત્રી પર બળાત્કાર થયો છે. આ દંપતી ચંદન નગર મેટ્રો સ્ટેશન હેઠળ રહેતું હતું. આ માહિતી પર, તાત્કાલિક કેસ નોંધવામાં આવ્યો હતો અને ઘટનાની તપાસ માટે પાંચ પોલીસ ટીમો બનાવવામાં આવી હતી. ઉપરાંત, આરોપી પર 1 લાખ રૂપિયાનું ઈનામ પણ જાહેર કરવામાં આવ્યું હતું.

શ્રીવાસ્તવે જણાવ્યું હતું કે મેટ્રો સ્ટેશન પર લગાવેલા કેમેરાના ફૂટેજ પરથી જાણવા મળ્યું છે કે બુધવાર-ગુરુવાર રાત્રે લગભગ 3 વાગ્યાની આસપાસ, એક યુવક સફેદ સ્કૂટી પર આવ્યો અને છોકરીનું અપહરણ કર્યું અને તેને મેટ્રો સ્ટેશનની લિફ્ટ પાછળ લઈ ગયો અને તેને પોતાની વાસનાનો શિકાર બનાવી હતી. ત્યારબાદ, અન્ય કેમેરાના ફૂટેજ પરથી સ્કૂટીનો નંબર ઓળખાયો, જેમાં જાણવા મળ્યું કે આરોપીનું નામ દીપક વર્મા (26) છે અને તે ઐશબાગ વિસ્તારમાં રહે છે.

તેમણે કહ્યું કે ગુરુવારે મોડી રાત્રે પોલીસને માહિતી મળી હતી કે આરોપી ભાગવાનો છે. આના પર પોલીસ ઘટનાસ્થળે પહોંચી અને તેને રોકવાનો પ્રયાસ કર્યો પરંતુ આરોપીએ પોલીસ પર ગોળીબાર કર્યો હતો. જવાબી ગોળીબારમાં વર્મા ગંભીર રીતે ઘાયલ થયો હતો. તેને લોકબંધુ હોસ્પિટલમાં દાખલ કરવામાં આવ્યો હતો જ્યાં સારવાર દરમિયાન તેનું મૃત્યુ થયું હતું.

પોલીસ નાયબ કમિશનરે જણાવ્યું હતું કે આરોપી અંગે માહિતી મળી છે કે તેની સામે કેસ નોંધાયેલ છે. તે રેલ્વેમાં પાણી વેચતો અને જાગરાતોમાં ટેબ્લો લગાવતો પણ હતો. તેમણે કહ્યું કે બળાત્કાર પીડિત છોકરીની કિંગ જ્યોર્જ મેડિકલ યુનિવર્સિટીમાં સારવાર ચાલી રહી છે. તેની હાલત ગંભીર છે.