પાકિસ્તાનને સમર્થન તુર્કીને પડ્યું ભારે, મુંબઈ કોર્પોરેશન રોબોટિક લાઈફબોય યોજના પડતી મુકી

મુંબઈઃ મુંબઈને હવે તેના સ્વપ્ન સમાન રોબોટિક લાઈફબોય મેળવવા માટે વધુ રાહ જોવી પડી શકે છે કારણ કે શહેરના મ્યુનિસિપલ કોર્પોરેશને તુર્કીમાં બનેલા રોબોટ્સ ખરીદવાની યોજના રદ કરી છે. પ્રારંભિક યોજના મુજબ, આ રિમોટ-ઓપરેટેડ રેસ્ક્યુ ડિવાઇસ મુંબઈના છ મુખ્ય દરિયાકિનારા પર તૈનાત કરવાના હતા. ભારત-તુર્કી સંબંધોમાં ખટાશ અને પાકિસ્તાનને તુર્કીના સમર્થનને કારણે આ નિર્ણય લેવામાં આવ્યો હતો.

તુર્કીની સરકારે ઓપરેશન સિંદૂર અને ભારતના આતંકવાદ વિરોધી પગલાંની ટીકા કરી હતી, જેના કારણે બંને દેશો વચ્ચેના વેપાર સંબંધોમાં તણાવ આવ્યો હતો. આના કારણે તુર્કી ઉત્પાદનોનો બહિષ્કાર કરવાની માંગ પણ થઈ હતી.

બૃહન્મુંબઈ મ્યુનિસિપલ કોર્પોરેશને આ રોબોટિક લાઈફબોયને ગિરગાંવ ચોપાટી, શિવાજી પાર્ક (દાદર), જુહુ, વર્સોવા, અક્સા અને ગોરાઈ દરિયાકિનારા પર તૈનાત કરવાની યોજના બનાવી હતી. જોકે, 22 એપ્રિલે પહેલગામમાં થયેલા આતંકવાદી હુમલા પર ભારતની પ્રતિક્રિયા સામે તુર્કીના વિરોધને કારણે આ યોજના રદ કરવામાં આવી હતી.

મ્યુનિસિપલ કમિશનર ભૂષણ ગગરાણીએ સ્પષ્ટતા કરી હતી કે મ્યુનિસિપલ કોર્પોરેશને તુર્કીમાં ઉત્પાદિત રોબોટિક લાઇફબોય ખરીદવાની યોજના રદ કરી છે. આ રોબોટિક લાઇફબોય લાઇફગાર્ડ્સને મદદ કરવા માટે બનાવવામાં આવ્યા હતા. તેમની પાસે ડ્યુઅલ વોટર જેટ અને 10,000 mAh રિચાર્જેબલ બેટરી છે. તેઓ 200 કિલો સુધીનો ભાર વહન કરી શકે છે અને 18 કિલોમીટર પ્રતિ કલાકની ઝડપે સમુદ્રમાં 800 મીટરનું અંતર કાપી શકે છે. એકવાર ચાર્જ કર્યા પછી, તે લગભગ એક કલાક સુધી કામ કરી શકે છે.

યુરેશિયન દેશ સાથેના આ સોદા પછી, BMC ને ભાજપ અને શિવસેના સહિત ઘણા રાજકીય પક્ષો તરફથી તીવ્ર ટીકાનો સામનો કરવો પડ્યો. નેતાઓએ વિદેશી સાધનોની ખરીદી પર સવાલ ઉઠાવ્યા અને સ્વદેશી ઉત્પાદનને પ્રોત્સાહન આપવાની માંગ કરી.