હિઝબુલ્લાહના ટોચના કમાન્ડર અલી હમ્માદીની ગોળી મારીને હત્યા કરાઈ

પૂર્વી લેબનોનના બેકા ખીણ વિસ્તારમાં અજાણ્યા બંદૂકધારીઓ દ્વારા હિઝબુલ્લાહના નેતા શેખ મુહમ્મદ અલી હમ્માદીની ગોળી મારીને હત્યા કરવામાં આવી હતી. અહેવાલ મુજબ, સ્થાનિક હિઝબુલ્લાહ કમાન્ડર હમ્માદીને પશ્ચિમી બેકા જિલ્લાના મછઘરામાં તેમના ઘર નજીક છ ગોળી મારીને હત્યા કરવામાં આવી હતી. મીડિયા રિપોર્ટ્સ અનુસાર, હમ્માદીને તાત્કાલિક નજીકની હોસ્પિટલમાં લઈ જવામાં આવ્યા હતા જ્યાં સારવાર દરમિયાન તેમનું મૃત્યુ થયું હતું.

એવું કહેવાય છે કે પારિવારિક વિવાદની શંકાને કારણે આ ઘટનાને અંજામ આપવામાં આવ્યો હતો. લેબનીઝ અધિકારીઓએ તપાસ શરૂ કરી છે. કેટલાક મીડિયા અહેવાલોમાં, આ હત્યા પાછળ ઇઝરાયલનો હાથ હોવાનું કહેવામાં આવી રહ્યું છે. યુએસ ફેડરલ એજન્સી એફબીઆઈના મોસ્ટ વોન્ટેડ આતંકવાદીઓની યાદીમાં મોહમ્મદ અલી હમ્માદીનો પણ સમાવેશ કરવામાં આવ્યો હતો. તેણે એથેન્સથી રોમ જઈ રહેલા 153 મુસાફરો અને ક્રૂ સભ્યોને લઈને જતા વિમાનનું અપહરણ કર્યું હતું.

ગયા વર્ષે નવેમ્બરમાં, ઇઝરાયલ અને હિઝબુલ્લાહ વચ્ચે યુદ્ધવિરામ કરાર પર હસ્તાક્ષર થયા હતા. આ કરાર હેઠળ, બંને પક્ષો વચ્ચે 13 મહિનાથી ચાલી રહેલા યુદ્ધનો અંત આવ્યો હતો. કરાર હેઠળ, લેબનીઝ સેનાને દક્ષિણ લેબનોનમાં તૈનાત કરવાની હતી અને હિઝબુલ્લાહ અને ઇઝરાયલ તેમના દળો પાછા ખેંચી લેશે. જોકે, બંને પક્ષોએ એકબીજા પર કરારનું ઉલ્લંઘન કરવાનો આરોપ લગાવ્યો હતો.

કરાર હેઠળ, ઇઝરાયલે 26 જાન્યુઆરી સુધીમાં દક્ષિણ લેબનોનમાંથી પોતાના સૈનિકો પાછા ખેંચવાના રહેશે. આ દરમિયાન, હિઝબુલ્લાહને ઇઝરાયલી સરહદથી લિટાની નદીની ઉત્તરે એક બિંદુ સુધી પીછેહઠ કરવી પડશે. જેમ જેમ ઇઝરાયલી દળો દક્ષિણ લેબનોનમાંથી પાછા હટી જશે, તેમ લેબનીઝ સેના આ ખાલી કરાયેલા વિસ્તારોમાં હજારો સૈનિકો તૈનાત કરશે. આ સાથે, લેબનીઝ સેના દક્ષિણ લેબનોનમાં પહેલાથી જ હાજર સંયુક્ત રાષ્ટ્રના નિરીક્ષક દળને પણ તૈનાત કરશે.

Top Hezbollah commander Ali Hammadi shot dead