લખતરના ઐતિહાસિક ગઢની દીવાલ બની જર્જરિત, દીવાલમાંથી પથ્થરો નીકળવા લાગ્યા
- લખતરના ઠોકોર સાહેબે કિલ્લાની જાળવણી કરવા સરકારને લખ્યો પત્ર
- તંત્ર દ્વારા ધ્યાન ન અપાતા કિલ્લો બન્યો જર્જરિત
- અગાઉ પણ રજુઆતો કરવામાં આવી હતી, છતાંયે કોઈ જ પગલાં ન લેવાયા
સુરેન્દ્રનગરઃ જિલ્લાનું લખતર શહેર ઐતિહાસિક ગણાય છે. અને વર્ષો પહેલા ગામ ફરતે બંધાયેલો કિલ્લો આજે પણ અડિખમ રીતે ઊભો છે. પણ તંત્રની લાપરવાહીને કારણે હવે આ કિલ્લો જર્જરીત બની રહ્યો છે. દીવાલમાંથી પથ્થરો પણ નીકળવા લાગ્યા છે. ત્યારે લખતરનાં ઠાકોર સાહેબે પણ આ કિલ્લો સરકાર હસ્તગત કરી જાળવણી કરે એવી સરકારને રજુઆત કરી છે.
લખતરની વિરાસત સમો અંદાજિત 130 વર્ષથી વધુ વર્ષથી અડીખમ ઊભેલો કિલ્લો તંત્રની અને સરકારની ધ્યાન ન આપવાની નીતિને કારણે જાળવણીનાં અભાવે ધીમે ધીમે વિનાશ તરફ જઈ રહ્યો હોય તેવો ઘાટ સર્જાયો છે. ગઢની દીવાલમાંથી પથ્થર નીકળવા લાગ્યા છે. જો આ પ્રમાણે પથ્થરો નીકળતા રહેશે, તો કિલ્લો ધ્વસ્ત બની જશે. સરકાર દ્વારા પણ અગાઉ 100 વર્ષ કરતા જૂની ઈમારતોને હેરિટેજમાં સમાવવા માટેની જાહેરાત કરવામાં આવી છે. ત્યારે લખતરમાં અંદાજે 130 વર્ષથી ગામ ફરતે ગામની રક્ષા કરતો કિલ્લો અડીખમ ઉભેલો છે. પરંતુ હાલમાં હવે તે જાળવણીનાં અભાવે ધીમે ધીમે જર્જરિત થઇ રહ્યો છે.
સૂત્રોના કહેવા મુજબ જિલ્લા કલેક્ટર, અગાઉ સરકારની ટર્મનાં પંચાયત મંત્રી સહિતનાઓને આ કિલ્લાની જાળવણી અંગે રજૂઆતો કરવામાં આવી હતી. તેમ છતાં પરિણામ હાલની તારીખમાં પણ શૂન્ય છે. તંત્ર હોય કે પદાધિકારી તેઓ આ કિલ્લાની જાળવણી પ્રત્યે સતત ઉદાસીનતા દાખવી રહ્યા છે. તેના કારણે આ વિરાસત સમો કિલ્લો હવે ધીમે ધીમે વિનાશ તરફ જઈ રહ્યો છે. અગાઉ કરણી સેના દ્વારા પણ મહારેલી યોજી આ કિલ્લાની જાળવણી માટે આવેદનપત્ર આપવમાં આવ્યું હતું. તેમજ લખતરનાં ઠાકોર સાહેબ દ્વારા પણ આ કિલ્લો સરકાર હસ્તગત કરી જાળવણી કરે તે માટે રજુઆત કરવામાં આવી છે. પરંતુ તંત્ર ધ્યાન આપતું નથી. શહેરનાં કાદેસર તળાવની નજીક આવેલા કિલ્લાના કોઠામાંથી પથ્થર નીકળવા લાગ્યા છે. ત્યારે આ કિલ્લાની જાળવણી થાય તેવી માગ ઊઠી રહી છે.
