કોર્ટે અમાનતુલ્લા ખાનની ધરપકડ પર 24 ફેબ્રુઆરી સુધી રોક લગાવી છે

આમ આદમી પાર્ટીના ધારાસભ્ય અમાનતુલ્લા ખાને રાઉઝ એવન્યુ કોર્ટમાં આગોતરા જામીન અરજી દાખલ કરી હતી. જે બાદ AAP ધારાસભ્યની આગોતરા જામીન અરજી પર રાઉઝ એવન્યુ કોર્ટમાં સુનાવણી હાથ ધરવામાં આવી હતી. કોર્ટે અમાનતુલ્લા ખાનની ધરપકડ પર 24 ફેબ્રુઆરી સુધી રોક લગાવી છે. કોર્ટે અમાનતુલ્લાને તપાસમાં જોડાવા માટે કહ્યું છે. જામિયા નગરમાં પોલીસ ટીમ પર કથિત રીતે હુમલાની આગેવાની કરવા બદલ અમાનતુલ્લા વિરુદ્ધ FIR નોંધવામાં આવી છે.

ઓખલાના ધારાસભ્ય અમાનતુલ્લા ખાન અને તેમના સમર્થકો સામે પોલીસ ટીમ પર હુમલો, હુલ્લડો ભડકાવવા અને સરકારી કામમાં અવરોધ જેવી કલમો હેઠળ સોમવારે કેસ નોંધવામાં આવ્યો હતો. ક્રાઈમ બ્રાન્ચની ટીમે હત્યાના પ્રયાસના આરોપી શબાઝ ખાનને બચાવ્યા બાદ આ કાર્યવાહી કરવામાં આવી હતી.

દક્ષિણ-પૂર્વ જિલ્લા પોલીસના ડેપ્યુટી કમિશનર રવિ કુમાર સિંહે જણાવ્યું હતું કે પોલીસ ટીમ મોડી સાંજે ધારાસભ્યના ઘરે તેમની પૂછપરછ કરવા ગઈ હતી, પરંતુ તેમને મળી ન હતી. ખરેખર ક્રાઈમ બ્રાન્ચની ટીમ ગુનેગારને પકડવા માટે જામિયા નગર ગઈ હતી. ધારાસભ્યની હાજરીમાં પોલીસ કાર્યવાહી ખોરવાઈ હતી. દક્ષિણ-પૂર્વ જિલ્લા પોલીસ અધિકારીઓના જણાવ્યા અનુસાર, ક્રાઈમ બ્રાન્ચમાં તૈનાત ઈન્સ્પેક્ટર સુનીલ કાલખંડેની ટીમ પર હુમલો કરવામાં આવ્યો હતો અને હત્યાના પ્રયાસના આરોપીને બચાવી લેવામાં આવ્યો હતો. તે સમયે ધારાસભ્ય પણ ત્યાં હાજર હતા.

દિલ્હી વિધાનસભા ચૂંટણીમાં આમ આદમી પાર્ટીના નેતા અમાનતુલ્લા ખાને ઓખલા સીટ પરથી 23 હજારથી વધુના માર્જીનથી જીત મેળવી હતી. અહીં તેમણે ભાજપના મનીષ ચૌધરીને હરાવ્યા હતા. મનીષને કુલ 65304 વોટ મળ્યા, અમાનતુલ્લાને કુલ 88943 વોટ મળ્યા.