દેશને ભાષાના આધારે વિભાજીત ન કરવો જોઈએઃ સીએમ યોગી

લખનૌઃ ઉત્તર પ્રદેશના મુખ્યમંત્રી યોગી આદિત્યનાથે કહ્યું કે દેશને ભાષાના આધારે વિભાજીત ન કરવો જોઈએ. ત્રણ ભાષાના વિવાદ અંગે, સીએમ યોગીએ તમિલનાડુના મુખ્યમંત્રી એમકે સ્ટાલિન પર આકરા પ્રહાર કરતા જણાવ્યું હતું કે, તમિલ ભારતની સૌથી જૂની ભાષાઓમાંની એક છે અને તેનો ઇતિહાસ સંસ્કૃત જેટલો જૂનો છે. દરેક ભારતીયને તમિલ પ્રત્યે આદર છે કારણ કે ભારતીય વારસાના ઘણા તત્વો હજુ પણ આ ભાષામાં જીવંત છે.

સીએમ યોગીએ કહ્યું, "મારું માનવું છે કે આપણા રાષ્ટ્રગીત દ્વારા પણ આ જ સંદેશ આપવામાં આવે છે. આ ફક્ત સંકુચિત રાજકારણ છે. જ્યારે આ લોકોને લાગે છે કે તેમની વોટ બેંક જોખમમાં છે, ત્યારે તેઓ પ્રદેશ અને ભાષાના આધારે વિભાજન કરવાનો પ્રયાસ કરે છે. આ દેશના લોકોએ હંમેશા આવી વિભાજનકારી રાજનીતિથી સાવધ રહેવું જોઈએ અને દેશની એકતા માટે અડગ રહેવું જોઈએ."

સીએમ યોગીએ વધુમાં કહ્યું, "હું કહું છું કે આપણે દરેક ભાષા શીખવી જોઈએ. અમે ઉત્તર પ્રદેશની યુનિવર્સિટીઓમાં તમિલ, તેલુગુ, કન્નડ અને મલયાલમ શીખવીએ છીએ. અમે ફક્ત આ જ શીખવી રહ્યા નથી, પરંતુ અમે ઉત્તર પ્રદેશની યુનિવર્સિટીઓમાં વિદેશી ભાષાઓ પણ શીખવી રહ્યા છીએ. આ બધું રાષ્ટ્રીય શિક્ષણ નીતિમાં લાગુ કરવામાં આવ્યું છે. જો આપણે ઉત્તર પ્રદેશની યુનિવર્સિટીઓમાં તમિલ, તેલુગુ, મલયાલમ, કન્નડ, મરાઠી અને અન્ય ભાષાઓ શીખવી શકીએ છીએ, તો પછી તમિલનાડુની યુનિવર્સિટીઓમાં હિન્દી શીખવવામાં શું ખોટું છે? મારું માનવું છે કે આપણે દેશ માટે એક વ્યાપક અભિગમ અપનાવવો જોઈએ."

યુપીના મુખ્યમંત્રીએ કહ્યું, "જુઓ, ગૃહમંત્રીએ આ બાબતે ખૂબ જ સ્પષ્ટ વાત કરી છે. આ બેઠકની આડમાં સ્ટાલિનનો રાજકીય એજન્ડા છે. મારું માનવું છે કે ગૃહમંત્રીના નિવેદન પછી, આ મુદ્દા પર કોઈ પ્રશ્નો ઉભા થવા જોઈએ નહીં." એટલું જ નહીં, સીએમ યોગીએ કહ્યું કે, "100 હિન્દુ પરિવારોમાં એક મુસ્લિમ પરિવાર સૌથી સુરક્ષિત છે. તેમને તેમના તમામ ધાર્મિક રીતરિવાજોનું પાલન કરવાની સ્વતંત્રતા હશે, પરંતુ શું 100 મુસ્લિમ પરિવારોમાં 50 હિન્દુઓ સુરક્ષિત રહી શકે છે? ના... બાંગ્લાદેશ આનું ઉદાહરણ છે. અગાઉ, પાકિસ્તાન આનું ઉદાહરણ હતું."