પાકિસ્તાનમાં રમઝાન માસમાં જ ખાંડના ભાવમાં વધારો, લોકોની મુશ્કેલીઓ વધી

નવી દિલ્હીઃ ભારતનો પડોશી દેશ પાકિસ્તાન આર્થિક મુશ્કેલીમાંથી પસાર થઈ રહ્યો છે અને જીવન જરુરી વસ્તુઓના ભાવમાં વધારો થયો છે. દરમિયાન પાકિસ્તાનમાં ખાંડના ભાવને લઈને હોબાળો મચી ગયો છે. રમઝાન મહિનામાં પાકિસ્તાનમાં ખાંડનો વપરાશ વધુ હોવાથી માંગ ઘણી વધી ગઈ છે, પરંતુ પુરવઠો ઓછો હોવાથી છૂટક બજારમાં ખાંડ 180 રૂપિયા પાકિસ્તાની પ્રતિ કિલોના ભાવે ઉપલબ્ધ છે. જોકે, પાકિસ્તાનના નાયબ વડા પ્રધાન ઇશાક ડારે થોડા દિવસો પહેલા ખાંડના ભાવમાં વધારા અંગે ચેતવણી આપી હતી. તેમણે કહ્યું હતું કે પાકિસ્તાનમાં ખાંડના ભાવ 164 રૂપિયા પ્રતિ કિલોની નિશ્ચિત મર્યાદાને પાર ન કરવા જોઈએ. પરંતુ પાકિસ્તાનના છૂટક બજારોમાં ખાંડના ભાવ આસમાને પહોંચી રહ્યા છે, જે 180 રૂપિયામાં વેચાઈ રહ્યા છે.

કરાચી હોલસેલર્સ ગ્રોસર્સ એસોસિએશન (KWGA) ના પ્રમુખ રૌફ ઇબ્રાહિમે જણાવ્યું હતું કે, "પાકિસ્તાનના વડા પ્રધાન શાહબાઝ શરીફે 15 માર્ચે ખાંડના સંગ્રહખોરો પર કાર્યવાહીની જાહેરાત કરી હતી. આ પછી, કરાચીમાં ખાંડનો જથ્થાબંધ ભાવ 168 રૂપિયાથી ઘટીને 158 રૂપિયા પ્રતિ કિલોગ્રામ થઈ ગયો." તેમણે કહ્યું, "જોકે, ખાંડના જથ્થાબંધ ભાવમાં 10 રૂપિયાનો થોડો ઘટાડો પણ છૂટક વેપારીઓને ખાંડના ભાવમાંથી નફો કમાવવાથી રોકી શક્યો નહીં. બીજી તરફ, રમઝાન મહિનાને કારણે, ખાંડની માંગમાં નોંધપાત્ર વધારો થયો છે."

રૌફ ઇબ્રાહિમે વધુમાં કહ્યું, "પાકિસ્તાનની શાહબાઝ શરીફ સરકાર દેશમાં ખાંડના ભાવને સ્થિર કરવામાં અને ગ્રાહકોને 130 રૂપિયા પ્રતિ કિલોગ્રામના ગેરંટીકૃત દરે ખાંડ પૂરી પાડવામાં નિષ્ફળ રહી છે." તેમણે કહ્યું, "પાકિસ્તાનમાં ખાંડના વધેલા ભાવને કારણે, ખાંડના છૂટક વેપારીઓને સૌથી વધુ નુકસાન થઈ રહ્યું છે. બીજી તરફ, સરકાર ફક્ત ખાંડ મિલ માલિકો પર આરોપ લગાવી રહી છે અને કોઈ કાર્યવાહી કરી રહી નથી."