દક્ષિણ ભારતીય ફિલ્મ અભિનેત્રીની સોનાની દાણચોરીના આરોપ સબબ ધરપકડ કરાઈ

બેંગ્લોરઃ દક્ષિણ ભારતીય ફિલ્મ અભિનેત્રી રાન્યા રાવની સોનાની દાણચોરીના આરોપસર ધરપકડ કરવામાં આવી છે. આ અભિનેત્રી પોલીસ મહાનિર્દેશક (પોલીસ હાઉસિંગ કોર્પોરેશન) રામચંદ્ર રાવની પુત્રી છે. ડિરેક્ટોરેટ ઓફ રેવન્યુ ઇન્ટેલિજન્સ (DRI) ના અધિકારીઓએ રાત્રે કેમ્પેગૌડા ઇન્ટરનેશનલ એરપોર્ટ (KIA) પરથી સોનાની દાણચોરીના આરોપમાં તેની ધરપકડ કરી હતી. અભિનેત્રી પર 14.8 કિલો સોનું રાખવાનો આરોપ હતો. તેણીને ન્યાયાધીશ સમક્ષ રજૂ કરવામાં આવી, ત્યારબાદ અભિનેત્રીને 14 દિવસની ન્યાયિક કસ્ટડીમાં મોકલી દેવામાં આવી. આ આદેશ નાણાકીય ગુનાઓ માટેની ખાસ અદાલતના ન્યાયાધીશ દ્વારા જારી કરવામાં આવ્યો હતો. ન્યાયિક કસ્ટડીમાં લેવામાં આવતા પહેલા અભિનેત્રીનું બોવરિંગ હોસ્પિટલમાં તબીબી પરીક્ષણ કરવામાં આવ્યું હતું. અધિકારીઓના જણાવ્યા અનુસાર, રાન્યાએ દાવો કર્યો હતો કે તે વ્યવસાય માટે દુબઈ જઈ રહી હતી.

ડીઆરઆઈને જાણવા મળ્યું કે તેણી છેલ્લા 15 દિવસમાં ચાર વખત દુબઈ ગઈ હતી, ત્યારબાદ એજન્સીએ તેની ગતિવિધિઓ પર નજર રાખવાનું શરૂ કર્યું. આ ગુપ્ત માહિતીના આધારે, ડીઆરઆઈના અધિકારીઓ 3 માર્ચે, રાન્યાના આગમનના બે કલાક પહેલા એરપોર્ટ પર પહોંચ્યા. તે દુબઈથી અમીરાતની ફ્લાઇટમાં આવી હતી અને સોમવારે સાંજે 7 વાગ્યાની આસપાસ બેંગલુરુ એરપોર્ટ પર તેની અટકાયત કરવામાં આવી હતી. અભિનેત્રી રાન્યા રાવે પ્રખ્યાત અભિનેતા સુદીપ સાથે ફિલ્મ 'માનિક્ય' (2014) માં કામ કર્યું છે.