પહેલગામ હુમલાની તપાસમાં ચોંકાવનારા ખુલાસો, પાકિસ્તાનમાં લશ્કરના મુખ્યાલયમાં ઘડાયું હતું કાવતરુ

નવી દિલ્હીઃ 22 એપ્રિલના રોજ જમ્મુ અને કાશ્મીરના પહેલગામની બૈસરન ખીણમાં થયેલા આતંકવાદી હુમલાએ સમગ્ર વિશ્વને હચમચાવી નાખ્યું હતું. આ ક્રૂર હુમલામાં 26 પ્રવાસીઓએ જીવ ગુમાવ્યા, જ્યારે 20 થી વધુ લોકો ઘાયલ થયા હતા. NIA (નેશનલ ઇન્વેસ્ટિગેશન એજન્સી) દ્વારા હાથ ધરવામાં આવેલી પ્રાથમિક તપાસનો રિપોર્ટ બહાર આવ્યો છે, જેમાં પાકિસ્તાનના સમગ્ર ષડયંત્રનો પર્દાફાશ થયો છે. NIAના પ્રાથમિક રિપોર્ટમાં ઘણા ચોંકાવનારા ખુલાસા થયા છે. આ મુજબ, આ હુમલો પાકિસ્તાની આતંકવાદી સંગઠન લશ્કર-એ-તૈયબા, ISI અને પાકિસ્તાની સેનાના સહયોગથી કરવામાં આવ્યો હતો. આ હુમલાનું આયોજન ISI ના ઈશારે પાકિસ્તાનમાં લશ્કરના મુખ્યાલયમાં કરવામાં આવ્યું હતું. તપાસમાં જાણવા મળ્યું છે કે હુમલામાં સામેલ આતંકવાદીઓ પાકિસ્તાન અધિકૃત કાશ્મીર (POK) માં બેઠેલા તેમના હેન્ડલરોના સંપર્કમાં હતા. તેમને પાકિસ્તાન તરફથી માર્ગદર્શિકા અને ભંડોળ મળી રહ્યું હતું.

પહેલગામ હુમલામાં સામેલ આતંકવાદીઓની ઓળખ થઈ ગઈ છે. આ POK સાથે જોડાયેલા હતા. મુખ્ય આતંકવાદીઓની ઓળખ હાશિમ મુસા અને અલી ઉર્ફે તલ્હા ભાઈ તરીકે થઈ છે. બંને આતંકવાદી પાકિસ્તાનના નાગરિક છે અને લશ્કર-એ-તૈયબા સાથે સંકળાયેલા છે. બંનેને કાશ્મીરમાં રહેતા આદિલ ઠોકર દ્વારા મદદ કરવામાં આવી હતી. પાકિસ્તાની આતંકવાદીઓને મદદ કરવામાં ઓવર ગ્રાઉન્ડ વર્કર્સ (OGW) ની ભૂમિકા પ્રકાશમાં આવી છે. આ સ્થાનિક લોકો છે જે આતંકવાદીઓને લોજિસ્ટિકલ સપોર્ટ, માહિતી, માર્ગદર્શન અને છુપાયેલા સ્થળો પૂરા પાડે છે. પહેલગામ તપાસમાં 150 થી વધુ લોકોના નિવેદનો નોંધવામાં આવ્યા છે. OGW ના સંપર્કો અને સહયોગીઓની યાદી તૈયાર કરવામાં આવી છે. તેમની સામે વહીવટી અને કાનૂની કાર્યવાહીની પ્રક્રિયા શરૂ થઈ ગઈ છે.

તપાસ ટીમે બૈસરન ખીણમાં હુમલાની ઘટનાનું 3D મેપિંગ અને પુનર્નિર્માણ કર્યું હતું. આનાથી બેતાબ ખીણમાં શસ્ત્રો છુપાયેલા હોવાનું જાણવામાં મદદ મળી છે. ફોરેન્સિક પુરાવા એકત્રિત કરવામાં આવ્યા હતા, જેમાં વપરાયેલા કારતુસનો પણ સમાવેશ થતો હતો. તેને તપાસ માટે ફોરેન્સિક સાયન્સ લેબમાં મોકલવામાં આવ્યા છે. NIAના ડાયરેક્ટર જનરલ (DG) ના નેતૃત્વ હેઠળ તૈયાર કરાયેલ આ રિપોર્ટ ટૂંક સમયમાં કેન્દ્રીય ગૃહ મંત્રાલયને સુપરત કરવામાં આવશે. આ આધારે, આંતરરાષ્ટ્રીય મંચો પર પાકિસ્તાન સામે કાર્યવાહી કરવામાં આવશે. પુરાવા યુએન અને એફએટીએફ જેવા સંગઠનોને રજૂ કરી શકાય છે.