ઝારખંડમાં સુરક્ષાદળોએ પાંચ લાખનું ઈનામ ધરાવતા માઓવાદીને ઠાર માર્યો

નવી દિલ્હીઃ ઝારખંડના લાતેહાર જિલ્લામાં સુરક્ષા દળો સાથેની અથડામણમાં પ્રતિબંધિત સીપીઆઈ (માઓવાદી) ના એક સભ્યનું મોત નીપજ્યું હતું. તેના માથા પર 5 લાખ રૂપિયાનું ઇનામ હતું. એક વરિષ્ઠ પોલીસ અધિકારીએ જણાવ્યું કે ઓપરેશન દરમિયાન બીજા એક ઉગ્રવાદીની પણ ધરપકડ કરવામાં આવી હતી. તેમણે જણાવ્યું હતું કે મૌહાદંડ પોલીસ સ્ટેશનના અધિકારક્ષેત્ર હેઠળના દૌનાના જંગલમાં રવિવારે રાત્રે સુરક્ષા દળો અને માઓવાદીઓ વચ્ચે એન્કાઉન્ટર થયું હતું.

પલામુના ડીઆઈજી વાયએસ રમેશે જણાવ્યું હતું કે, 'મનીષ યાદવ, જેના પર 5 લાખ રૂપિયાનું ઈનામ હતું, તે સુરક્ષા દળો સાથેની એન્કાઉન્ટરમાં માર્યો ગયો હતો.' અન્ય એક માઓવાદી, કુંદન ખેરવારની ધરપકડ કરવામાં આવી હતી. કુંદનના માથા પર 10 લાખ રૂપિયાનું ઇનામ હોવાનું કહેવાય છે. જોકે, રમેશે કહ્યું કે કુંદનના માથા પરનું ઇનામ હજુ સુધી પુષ્ટિ થયેલ નથી.

જિલ્લામાં સુરક્ષા દળો દ્વારા શરૂ કરાયેલા નક્સલ વિરોધી ઓપરેશનમાં JJMP સુપ્રીમો પપ્પુ લોહારા સહિત બે માઓવાદીઓ માર્યા ગયાના માંડ બે દિવસ પછી આ ઓપરેશન શરૂ કરવામાં આવ્યું હતું. પપ્પુ લોહારા પર 10 લાખ રૂપિયાનું ઇનામ હતું. 24 મેના રોજ, પ્રતિબંધિત ઝારખંડ જન મુક્તિ પરિષદ (JJMP) ના વડા લોહારા અને સંગઠનના ઉપ-પ્રાદેશિક કમાન્ડર પ્રભાત ગંઝુ એક એન્કાઉન્ટરમાં માર્યા ગયા હતા. ગંજુ પર 5 લાખ રૂપિયાનું ઇનામ હતું.

લાતેહાર પોલીસ સ્ટેશનની હદ હેઠળના ઈચ્છાબાર જંગલ વિસ્તારમાં સેન્ટ્રલ રિઝર્વ પોલીસ ફોર્સ (CRPF) અને ઝારખંડ પોલીસ દ્વારા સંયુક્ત ઓપરેશન શરૂ કરવામાં આવ્યું હતું. લોહારડાગા, ગુમલા, ચતરા, પલામુ અને લાતેહાર જેવા અનેક જિલ્લાઓમાં હત્યા, ખંડણી અને આગચંપી સહિતના 98 કેસોમાં વોન્ટેડ હતો. રમેશના જણાવ્યા મુજબ, ગંઝુ 15 કેસમાં વોન્ટેડ હતો. આ બંને સપ્ટેમ્બર 2021 માં એક ઓપરેશન દરમિયાન ઝારખંડ જગુઆર્સના ડેપ્યુટી કમાન્ડન્ટ રાજેશ કુમારની હત્યામાં સામેલ હોવાનો આરોપ છે.