યુક્રેન પર રશિયાનો ડ્રોન અને મિસાઇલોથી હુમલો, 11 લોકોના મોત

મોસ્કોના દળો પૂર્વી યુક્રેનમાં પોતાનું સ્થાન બનાવી રહ્યા છે. આ દરમિયાન રશિયાએ ફરીથી યુક્રેન પર હુમલો કર્યો છે. એવો દાવો કરવામાં આવી રહ્યો છે કે આ હુમલો 165 મિસાઇલો અને ડ્રોનથી કરવામાં આવ્યો હતો. તેમાં 11 લોકો માર્યા ગયા અને દેશભરમાં ડઝનબંધ રહેણાંક ઇમારતો તેમજ ઉર્જા માળખાને નુકસાન થયું છે.

18 ઇમારતો, એક કિન્ડરગાર્ટન અને ઉર્જા માળખાને નુકસાન થયું

રશિયન સંરક્ષણ મંત્રાલયે કહ્યું કે છેલ્લા 24 કલાકમાં 108 યુક્રેનિયન ડ્રોનને તોડી પાડવામાં આવ્યા છે. મિસાઇલ હુમલાથી પોલ્ટાવામાં 18 ઇમારતો, એક કિન્ડરગાર્ટન અને ઉર્જા માળખાને નુકસાન થયું છે. આ હુમલામાં સાત લોકો માર્યા ગયા અને ત્રણ બાળકો સહિત 14 લોકો ઘાયલ થયા છે. આને લગતી ઘણી તસવીરો પોસ્ટ કરવામાં આવી છે. બચાવ કાર્યકરો કાટમાળમાં શોધ કરતા જોવા મળે છે. મેયરે જણાવ્યું હતું કે ઉત્તરપૂર્વીય ખાર્કિવમાં ડ્રોન હુમલામાં એક વ્યક્તિનું મોત થયું હતું અને ચાર ઘાયલ થયા હતા. પ્રાદેશિક અધિકારીઓએ જણાવ્યું હતું કે આ હુમલામાં ત્રણ પોલીસ અધિકારીઓ માર્યા ગયા હતા. યુક્રેનના રાષ્ટ્રપતિ વોલોડીમીર ઝેલેન્સકીએ કહ્યું કે રશિયાએ મિસાઇલ, ડ્રોન અને બોમ્બનો ઉપયોગ કરીને આપણા શહેરો પર હુમલો કર્યો. છ વિસ્તારોમાં નુકસાન થયું છે.

ઉત્તર કોરિયાના સૈનિકો યુદ્ધના મેદાનમાં જોવા મળ્યા નથી

આવા દરેક હુમલા સાબિત કરે છે કે રશિયા સામે પોતાને બચાવવા માટે આપણને વધુ સમર્થનની જરૂર છે. દરેક હવાઈ સંરક્ષણ પ્રણાલી, મિસાઈલ વિરોધી શસ્ત્ર જીવન બચાવે છે. તમને જણાવી દઈએ કે યુક્રેનિયન લશ્કરી અધિકારીએ જણાવ્યું હતું કે ભારે નુકસાન સહન કર્યા પછી, ઉત્તર કોરિયાની સેના કદાચ રશિયાના કુર્સ્ક ક્ષેત્રમાં ફ્રન્ટ લાઇનથી પાછળ હટી ગઈ છે. યુક્રેનિયન સેનાના સ્પેશિયલ ઓપરેશન ફોર્સના પ્રવક્તા કર્નલ એલેક્ઝાંડરે સીએનએનને જણાવ્યું હતું કે છેલ્લા ત્રણ અઠવાડિયાથી ઉત્તર કોરિયાના સૈનિકો યુદ્ધના મેદાનમાં જોવા મળ્યા નથી. યુક્રેનિયન રાષ્ટ્રપતિના સલાહકાર મિખાઈલો પોડોલ્યાકે પણ આવા જ અહેવાલોનો ઉલ્લેખ કર્યો છે.