ટેસ્ટ ક્રિકેટમાંથી નિવૃત્તિની રોહિત શર્માના નિર્ણયથી તેના પિતા થયા હતા નારાજ
રોહિત શર્માએ ખુલાસો કર્યો કે પિતા ગુરુનાથ શર્મા ટેસ્ટમાંથી નિવૃત્તિ લેવાના તેમના નિર્ણયથી નિરાશ હતા. નિવૃત્તિ પછી પહેલી વાર રમતના સૌથી લાંબા ફોર્મેટ વિશે જાહેરમાં બોલતા, રોહિત શર્માએ કહ્યું, "મારા પિતા લાંબા સમયથી ટેસ્ટ ક્રિકેટના ચાહક છે અને તેમને "નવા યુગ"નું ક્રિકેટ પસંદ નથી."
એવું માનવામાં આવતું હતું કે રોહિત શર્મા ઇંગ્લેન્ડ પ્રવાસ પર કેપ્ટન બનશે, પરંતુ તે પહેલાં 7 મેના રોજ, રોહિતે ટેસ્ટમાંથી નિવૃત્તિ લઈને બધાને આશ્ચર્યચકિત કરી દીધા. અગાઉ, ન્યુઝીલેન્ડ અને ઓસ્ટ્રેલિયા સામેની ટેસ્ટ શ્રેણીમાં તેનું પ્રદર્શન સારું નહોતું, ભારત આ બંને શ્રેણી હારી ગયું હતું. રોહિત ઓસ્ટ્રેલિયા પ્રવાસ પર રમાયેલી છેલ્લી ટેસ્ટમાંથી બહાર થઈ ગયો હતો, ત્યારબાદ અટકળો શરૂ થઈ હતી કે તે નિવૃત્તિ લેશે. જોકે, તે સમયે રોહિતે કહ્યું હતું કે, "તે ક્યાંય જઈ રહ્યો નથી." અને આ પછી તેણે ઘરેલુ ક્રિકેટ પણ રમ્યો હતો.
મુંબઈમાં ચેતેશ્વર પૂજારાની પત્ની પૂજાના પુસ્તક 'ધ ડાયરી ઓફ અ ક્રિકેટર્સ વાઇફ'ના લોન્ચિંગ પ્રસંગે રોહિત શર્માએ કહ્યું, "મારા પિતા એક ટ્રાન્સપોર્ટ કંપનીમાં કામ કરતા હતા. મારા પિતાએ પણ અમારા જીવનને સારું બનાવવા માટે ઘણું બલિદાન આપ્યું હતું. મારા પિતા હંમેશા ટેસ્ટ ક્રિકેટના ચાહક રહ્યા છે. તેમને ક્રિકેટનો આ નવો યુગ પસંદ નથી. મને હજુ પણ તે દિવસ યાદ છે જ્યારે મેં ODIમાં 264 રન બનાવ્યા હતા. તેમણે કહ્યું, ઠીક છે, ખૂબ સારું. તેઓ બહુ ઉત્સાહી નહોતા. મેદાન પર જઈને આ બધું કરવું મહત્વપૂર્ણ છે. પરંતુ જો હું ટેસ્ટ ક્રિકેટમાં 30, 40 કે 50 રન બનાવું તો પણ તેઓ મારી સાથે તેના વિશે વિગતવાર વાત કરતા. આ રમત પ્રત્યેનો તેમનો પ્રેમ આવો જ હતો."
રોહિત શર્માએ કહ્યું કે સ્કૂલ ક્રિકેટ પછી, તે અંડર-19, રણજી ટ્રોફી, દુલીપ ટ્રોફી, પછી ઇન્ડિયા એ માટે રમ્યો. અને આ પછી જ હું ભારતીય ટીમમાં સ્થાન બનાવી શક્યો. મારા પિતાએ મારી ક્રિકેટ સફર જોઈ છે.
રોહિતે કહ્યું, "મારા પિતાએ મને લાલ બોલથી ખૂબ રમતા જોયો છે. તેમને લાલ બોલનું ક્રિકેટ ખૂબ ગમે છે, તેઓ તેની પ્રશંસા કરે છે. સ્વાભાવિક છે કે જ્યારે મેં ટેસ્ટમાંથી નિવૃત્તિની જાહેરાત કરી ત્યારે તેઓ થોડા નિરાશ થયા હતા. પરંતુ તે જ સમયે, તેઓ ખુશ પણ હતા. તેઓ મારા પિતા છે અને આજે હું જે કંઈ પણ છું, જ્યાં પણ છું તેમાં તેમણે ઘણું યોગદાન આપ્યું છે. તેમની મદદ વિના આ શક્ય ન હોત."