રાજસ્થાનઃ મંત્રી કિરોડીલાલ મીણાએ રાજુનામું આપ્યું, લોકસભાની દૌસા બેઠક ઉપર BJPની હારની જવાબદારી સ્વિકારી

જયપુરઃ રાજસ્થાનના કેબિનેટ મંત્રી કિરોરી લાલ મીણાએ પોતાનું રાજીનામું મુખ્યમંત્રી ભજનલાલ શર્માને મોકલી આપ્યું છે. જો કે હજુ સુધી રાજીનામું સ્વીકારવામાં આવ્યું નથી. રાજીનામું થોડા દિવસ પહેલા મોકલવામાં આવ્યું હતું, પરંતુ તેની માહિતી આજે સામે આવી છે. કિરોરી લાલ મીણાએ લોકસભા ચૂંટણી દરમિયાન કહ્યું હતું કે, જો ભાજપ દૌસા સીટ હારી જશે તો હું મંત્રી પદ પરથી રાજીનામું આપીશ.

લોકસભા ચૂંટણી 2024ના પરિણામો આવતા પહેલા કિરોરી લાલ મીણાએ જાહેરાત કરી હતી કે, જો તેઓ તેમના પ્રભાવના ક્ષેત્રમાં કોઈ પણ બેઠક ગુમાવશે તો તેઓ પદ પરથી રાજીનામું આપી દેશે. આ પછી, જ્યારે ચૂંટણી પરિણામો આવ્યા, ત્યારે સમજાયું કે દૌસા બેઠક હારી ગયા છે. તે જ સમયે, એવી અટકળો હતી કે તેઓ રાજીનામું આપશે, પરંતુ હવે તેમણે તેની જાહેરાત કરી છે.

કિરોરી લાલ મીણાએ પણ પોતાના સોશિયલ મીડિયા હેન્ડલ પર આ અંગે સંકેત આપ્યા હતા. દરમિયાન દૌસામાં હાર પછી, વિપક્ષ સતત તેમને નિશાન બનાવી રહ્યા હતા. કિરોરી લાલ મીણાનું કહેવું છે કે, તેઓ હારની નૈતિક જવાબદારી લે છે અને રાજીનામું આપી રહ્યા છે. જો કે હજુ સુધી તેમનું રાજીનામું સ્વીકારવામાં આવ્યું નથી. રાજસ્થાનના કૃષિ મંત્રી મીના પણ બે દિવસ પહેલા દિલ્હી ગયા હતા. તેથી જ તેઓ રાજ્ય વિધાનસભાના બજેટ સત્રમાં હાજર રહ્યા ન હતા.

તમને જણાવી દઈએ કે કિરોરી લાલ મીણા રાજ્યસભાના સાંસદ હતા. આ વખતે રાજસ્થાન વિધાનસભા ચૂંટણીમાં ભાજપે તેમને સવાઈ માધોપુરથી મેદાનમાં ઉતાર્યા હતા અને તેઓ જીત્યા હતા. કિરોરી લાલ મીણા પણ બે વખત લોકસભાના સાંસદ રહી ચૂક્યા છે. આ સિવાય તેઓ પાંચ વખત ધારાસભ્ય રહી ચૂક્યા છે.