ગુજરાતમાં બપોર સુધીમાં 99 તાલુકામાં વરસાદ પડ્યો, કાલથી ભારે વરસાદની આગાહી

• સપ્ટેમ્બરના પ્રથમ સપ્તાહમાં ભારેથી અતિભારે વરસાદ પડી શકે છે,
• ગુજરાતમાં સીઝમનો 90 ટકા વરસાદ પડ્યો, દરિયા કિનારે ભારે પવન ફુકાશે,
• માછીમારોને દરિયો ન ખેડવા સુચના

અમદાવાદઃ રાજ્યમાં આજે બપોર સુધીમાં 99 તાલુકામાં ઝાપટાંથી લઈને ત્રણ ઈંચ વરસાદ પડ્યો હતો. દરમિયાન રાજ્યના હવામાન વિભાગ દ્વારા આગામી 7 દિવસ એટલે કે 31 ઓગસ્ટથી 6 સપ્ટેમ્બર સુધી ભારેથી અતિભારે વરસાદની આગાહી છે. જેમાં ખાસ કરીને આગામી 4 સપ્ટેમ્બરથી રાજ્યમાં વરસાદનું જોર વધશે. ત્યારબાદ દક્ષિણ ગુજરાત અને સૌરાષ્ટ્રમાં ભારેથી અતિભારે વરસાદની શક્યતા છે. રાજ્યમાં સિઝનનો કુલ 90 ટકા વરસાદ વરસી ચૂક્યો છે. આજે મહીસાગર, પંચમહાલ અને દાહોદમાં છુટા છવાયા સ્થળોએ અતિ ભારે વરસાદને લઈને ઓરેન્જ એલર્ટ આપવામા આવ્યું છે.

રાજ્યના હવામાન વિભાગના સૂત્રોના જણાવ્યા મુજબ દરિયાઈ સપાટી પર મોન્સુન ટ્રફ હવે બિકાનેર, અજમેર, ગુના, દમોહ, રાયપુર, પુરી અને ત્યાંથી પૂર્વ-દક્ષિણપૂર્વ તરફ મધ્ય બંગાળની ખાડમાંથી પસાર થાય છે. આ ઉપરાંત દક્ષિણ પશ્વિમ મધ્ય પ્રદેશ અપર એર સાયક્લોનિક સરક્યુલેશન હવે ઉત્તર પશ્વિમમાં છે. તેમજ રાજસ્થાનના મધ્ય ભાગો પર એક અપર એર સાયક્લોનિક સરક્યુલેશન છે અને જે દરિયાઈ સપાટીથી 1.5 કિમી ઉપર વિસ્તરે છે. તેથી ગુજરાતમાં સપ્તાહ દરમિયાન ભારેથી અતિભારે વરસાદ પડી શકે છે

સૌરાષ્ટ્ર અને દક્ષિણ ગુજરાતનો દરિયો તોફાની બને તેવી શક્યતા છે. દરિયા કાઠા વિસ્તારમાં 40થી 50 કિમીની ઝડપે પવન ફુકાય શકે છે. માછીમારોને દરિયો ન ખેડવા સૂચના આપવામાં આવી છે.  આજે મહીસાગર, પંચમહાલ અને દાહોદમાં છુટા-છવાયા સ્થળોએ અતિભારે વરસાદને લઈને ઓરેન્જ એલર્ટ આપવામાં આવ્યું છે. જ્યારે સાબરકાંઠા, મહેસાણા, અરવલ્લી, ગાંધીનગર, અમદાવાદ, ખેડા, આણંદ, વડોદરા, છોટાઉદેપુર, ભરૂચ, નર્મદા, સુરત, તાપી, નવસારી, ડાંગ, વલસાડ, દમણ અને દાદરા નગર હવેલીમાં છુટાછવાયા સ્થળોએ ભારે વરસાદને લઈને યલો એલર્ટ આપવામાં આવ્યું છે. આવતીકાલે એટલે કે, 1 સપ્ટેમ્બરના રોજ સાબરકાંઠા, અરવલ્લી, મહીસાગર, દાહોદ, પંચમહાલ, નવસારી, વલસાડ, દમણ અને દાદરા નગરહવેલીમાં છૂટાછવાયા સ્થળોએ ભારે વરસાદને લઈને યલો એલર્ટ આપવામાં આવ્યું છે. આજે અમદાવાદમાં છુટાછવાયા સ્થળોએ હળવાથી મધ્યમ વરસાદની સંભાવના હવામાન વિભાગ દ્વારા કરવામાં આવી છે.