ગુજરાતમાં ફર્જી નામે સીમકાર્ડ ખરીદીને દૂબઈ મોકલવાનું રેકેટ પકડાયુ, આરોપીની ધરપકડ

• ગુજરાતમાંથી 1000 જેટલા સીમકાર્ડ દૂબઈ મોકલાયા હતા
• દૂબઈમાં કોલ સેન્ટર દ્વારા સાયબર માફિયા રેકેટ ચલાવતા હતા
• મોબાઈલ કંપનીના એજન્ટની પણ સંડોવણી ખૂલી

અમદાવાદઃ ગુજરાતમાં સાયબર ફ્રોડના બનાવો વધી રહ્યા છે. ભણેલા-ગણેલા લોકો જ સાયબર માફિયાની ઝાળમાં વધુ ફસાતા હોય છે. શહેરમાં કેટલાક દિવસ પહેલા એક સિનિયર સિટિઝનને ડિજિટલ એરેસ્ટ કરીને 25 લાખનો ફ્રોડ કરવામાં આવ્યો હતો. અમદાવાદ સાયબર ક્રાઈમ બ્રાન્ચ પોલીસે તપાસ કરતા ચાર આરોપીને પકડી પાડ્યા હતા. આ સાયબર ફ્રોડની તપાસમાં એવી હકિકત જાણવા મળી હતી કે, ગુજરાતમાં સીમ કાર્ડ ફર્જી નામે ખરીદીને દૂબઈ મોકલવામાં આવતા હતા. આરોપીએ છેલ્લા બે વર્ષમાં ગેરકાયદે રીતે 1000થી વધુ સિમ કાર્ડ દુબઈ સ્થિત કોલ સેન્ટરોમાં મોકલીને મોટું નેટવર્ક ચલાવ્યું હતું.

આ બનાવની વિગત એવી હતી કે, શહેરમાં થોડા દિવસ પહેલાં એક સિનિયર સિટીઝનને ડિજિટલ એરેસ્ટ કરીને  25 લાખ રૂપિયાનો ફ્રોડ કરાયો હતો. સાયબર ક્રાઈમ બ્રાંચે ત્વરિત તપાસ હાથ ધરીને આ ફ્રોડમાં વપરાયેલા વોટ્સએપ નંબરની કોલ ડિટેલ કઢાવતા તે અમદાવાદના એક વ્યક્તિના નામે નોંધાયેલો હોવાનું જણાયું હતું. જે ગ્રાહકના નામે સિમ કાર્ડ હતું, તેને પકડી લેવાયો હતો. પકડાયોલા આરોપીએ  પોલીસને જણાવ્યું કે તે તેમના પિતાનું સિમ કાર્ડ પોતાના નામે ટ્રાન્સફર કરાવવા માટે એક એરટેલ એજન્ટ પાસે ગયા હતા. એજન્ટે ટ્રાન્સફરના બહાને તેમના બાયોમેટ્રિક્સ અને દસ્તાવેજો મેળવી લીધા, પરંતુ પછી 'ટેકનિકલ એરર'નું બહાનું આપી ટ્રાન્સફર ન થઈ શક્યું હોવાનું કહી દીધું હતું. તપાસમાં ખુલાસો થયો કે ગ્રાહકની જાણ બહાર આ સિમ કાર્ડ ઇશ્યૂ કરીને તરત જ તેને દુબઈ મોકલી દેવામાં આવ્યું હતું, જેનો ઉપયોગ સાઈબર ક્રાઇમ અને ગેરકાયદે બેટિંગ કોલ સેન્ટરોમાં થઈ રહ્યો હતો.

સાઇબર ક્રાઇમ પોલીસે આ મામલે ફરિયાદ દાખલ કરીને તપાસ શરૂ કરી અને ચાર આરોપીઓની ધરપકડ કરી હતી. આ કૌભાંડમાં મુખ્ય ભૂમિકા વિજય રાવળની હતી, જે એરટેલનો એજન્ટ અને મુખ્ય ડિસ્ટ્રીબ્યુટર હતો. તે ગ્રાહકોના નામે ગેરકાયદે રીતે સિમ કાર્ડ ઇશ્યૂ કરતો હતો. પકડાયેલા મોટાભાગના સિમ કાર્ડ એરટેલના હતા, કારણ કે કંબોડિયાના કોલ સેન્ટરોમાં નેટવર્ક કનેક્ટિવિટીને લીધે તેની વધુ માંગ હતી. શુભમ પરાડિયા અને કિરણ ઠક્કર ઈશ્યૂ થયેલા સિમ કાર્ડ એકત્રિત કરીને દુબઈ મોકલવામાં મદદ કરતા હતા. આ ત્રણેયે બે વર્ષમાં 1000 જેટલા સિમ કાર્ડ દુબઈ મોકલ્યા હતા. ચોથો આરોપી કુલદીપ જોશી છે, જે દુબઈમાં બે વર્ષથી ગેરકાયદે બેટિંગ કોલ સેન્ટરોમાં કામ કરતો હતો અને માસિક 20,000થી 25,000 રૂપિયા પગાર મેળવતો હતો. જ્યારે પણ તે ગુજરાત આવતો ત્યારે શુભમ અને કિરણ પાસેથી સિમ કાર્ડ મેળવીને દુબઈ પહોંચાડવાનું કામ કરતો હતો.

સાયબર ક્રાઈમ પોલીસ સૂત્રોના કહેવા મુજબ  દુબઈમાં બે મુખ્ય આરોપીઓ ભાવેશ જોશી ઉર્ફે લાદેન અને કનુ વારાહી આ સિમ કાર્ડ રિસીવ કરતા હતા અને તેનો ઉપયોગ ગેરકાયદે પ્રવૃત્તિઓમાં કરાવતા હતા. તે ભારતમાં સિમ કાર્ડ ઇશ્યૂ કરનારાઓને પ્રતિ સિમ 1500 રૂપિયા ચૂકવતા હતા. ભારતના આરોપીઓ ગ્રાહકોને 500થી 700 રૂપિયા આપીને અથવા કન્સ્ટ્રક્શનના મજૂરોને ટાસ્ક પૂરો કરવાના બહાને શોધીને સિમ કાર્ડ ઇશ્યૂ કરાવતા હતા. આ ઉપરાંત પ્રાથમિક તપાસમાં બહાર આવ્યું છે કે, વર્ષ 2023 અને 2024 દરમિયાન ગુજરાતમાંથી 1000 જેટલા સિમ કાર્ડ દુબઈ પહોંચાડાયા છે, જેનો ઉપયોગ ગેરકાયદે બેટિંગ, ગેમિંગ અને સાઇબર ક્રાઈમ માટે થતો હતો. પોલીસે દુબઈમાં રહેલા ભાવેશ જોશી ઉર્ફે લાદેન અને કનુ વારાહીની ધરપકડ માટે વધુ તપાસ હાથ ધરી છે.