પંજાબ પોલીસના DIG લાંચ લેતા ઝડપાયા, અધિકારીના ઘરે અને ઓફિસમાં CBIની તપાસ
નવી દિલ્હી : કેન્દ્રીય તપાસ એજન્સી CBI (સેન્ટ્રલ બ્યુરો ઑફ ઇન્વેસ્ટિગેશન)એ ભ્રષ્ટાચાર વિરુદ્ધ મોટી કાર્યવાહી હાથ ધરતાં પંજાબ પોલીસના DIG (ડેપ્યુટી ઇન્સ્પેક્ટર જનરલ) હરચરણ સિંહ ભુલ્લરની ધરપકડ કરી છે. મળતી માહિતી અનુસાર, ભુલ્લર રોપડ (Ropar) રેન્જના DIG તરીકે ફરજ બજાવતા હતા અને તેમને લાંચ લેતા રંગે હાથે ઝડપી પાડવામાં આવ્યા છે. અત્યારે એજન્સી અધિકારીના નિવાસસ્થાન અને કાર્યાલયમાં તલાશી અને પુરાવા એકત્ર કરવાની પ્રક્રિયા ચાલી રહી છે.
આ મામલે આમ આદમી પાર્ટી (AAP)ના નેતા અને પંજાબના મુખ્યમંત્રીના પૂર્વ મીડિયા સલાહકાર બલતેજ પન્નુએ ધરપકડની પુષ્ટિ કરી છે. તેમણે જણાવ્યું હતું કે, “CBIએ પંજાબ સરકારને આ ધરપકડ અંગે જાણ કરી છે. સરકાર નિયમો અનુસાર આગળની કાર્યવાહી કરશે.” પન્નુએ વધુમાં સ્પષ્ટ કહ્યું કે, “પંજાબ સરકાર ભ્રષ્ટાચારને કોઈપણ સ્તરે સહન કરશે નહીં. જે કોઈ પણ દોષી સાબિત થશે, તેના સામે કડક પગલાં લેવામાં આવશે.” સૂત્રોના જણાવ્યા મુજબ, આ ધરપકડ પંજાબમાં ચાલી રહેલા ભ્રષ્ટાચાર વિરોધી અભિયાનનો એક ભાગ છે. CBI હવે આ કેસમાં વિસ્તૃત તપાસ હાથ ધરશે. તપાસ દરમિયાન અન્ય અધિકારીઓ અથવા સંકળાયેલા વ્યક્તિઓની ભૂમિકા પણ બહાર આવી શકે છે. CBIના સૂત્રોએ જણાવ્યું કે આ કાર્યવાહી “ભ્રષ્ટાચાર સામેની એજન્સીની ઝીરો ટોલરન્સ પોલિસી”ના અંતર્ગત કરવામાં આવી છે.
