
વડાપ્રધાન નરેન્દ્ર મોદી ફેબ્રુઆરીમાં અમેરિકા જઈ શકે છે. સોમવારે અમેરિકાના નવા રાષ્ટ્રપતિ ડોનાલ્ડ ટ્રમ્પ સાથે ફોન પર વાત કર્યા બાદ આ વાત સામે આવી છે. ટ્રમ્પે પોતે આ વાતનો ખુલાસો કર્યો છે. ટ્રમ્પે કહ્યું છે કે વડા પ્રધાન મોદી સંભવતઃ ફેબ્રુઆરીમાં તેમની સાથે મુલાકાત માટે અમેરિકી રાષ્ટ્રપતિના સત્તાવાર નિવાસસ્થાન અને કાર્યાલય વ્હાઇટ હાઉસ આવશે.
સોમવારે ફ્લોરિડાથી ‘જોઈન્ટ બેઝ એન્ડ્રુઝ’ પરત ફરતી વખતે ટ્રમ્પે એરફોર્સ વન પ્લેનમાં પત્રકારોને કહ્યું કે મારી તેમની સાથે લાંબી વાતચીત થઈ છે. તે કદાચ આવતા મહિને ફેબ્રુઆરીમાં ‘વ્હાઈટ હાઉસ’ આવશે. ભારત સાથે અમારા ઘણા સારા સંબંધો છે.
ટ્રમ્પ અને મોદી વચ્ચે સારા મૈત્રીપૂર્ણ સંબંધો
રાષ્ટ્રપતિ તરીકેના તેમના પ્રથમ કાર્યકાળ દરમિયાન ટ્રમ્પની છેલ્લી વિદેશ યાત્રા ભારતની હતી. ટ્રમ્પ અને મોદી વચ્ચે સારા મૈત્રીપૂર્ણ સંબંધો છે. બંનેએ સપ્ટેમ્બર 2019માં હ્યુસ્ટન અને ફેબ્રુઆરી 2020માં અમદાવાદમાં બે અલગ-અલગ રેલીઓમાં હજારો લોકોને સંબોધિત કર્યા હતા. નવેમ્બર 2024ની ચૂંટણીમાં જંગી જીત બાદ ટ્રમ્પ સાથે વાત કરનારા વિશ્વના ત્રણ ટોચના નેતાઓમાં મોદી હતા.
ભાગીદારીને આગળ લઈ જવાની પ્રતિબદ્ધતા વ્યક્ત કરી
અગાઉ, વ્હાઇટ હાઉસે કહ્યું હતું કે બંને નેતાઓએ યુએસ-ભારત વ્યૂહાત્મક ભાગીદારી અને ઇન્ડો-પેસિફિક ક્વોડ પાર્ટનરશિપને આગળ વધારવા માટે પ્રતિબદ્ધતા વ્યક્ત કરી છે. વડાપ્રધાન નરેન્દ્ર મોદીની વ્હાઇટ હાઉસ મુલાકાતની યોજનાઓ પર પણ ચર્ચા કરવામાં આવી હતી.
બંને વચ્ચે ફોન પર વાત થઈ
વ્હાઇટ હાઉસે જણાવ્યું હતું કે રાષ્ટ્રપતિ ડોનાલ્ડ જે ટ્રમ્પે ભારતના વડા પ્રધાન નરેન્દ્ર મોદી સાથે ફોન પર વાત કરી હતી. બંને નેતાઓએ સહયોગ વધારવા અને સંબંધોને ગાઢ બનાવવા અંગે ચર્ચા કરી હતી. તેઓએ ઈન્ડો-પેસિફિક, મધ્ય પૂર્વ અને યુરોપમાં સુરક્ષા સહિત અનેક ક્ષેત્રીય મુદ્દાઓ પર ચર્ચા કરી. રાષ્ટ્રપતિ ટ્રમ્પે ભારત દ્વારા યુએસ નિર્મિત સુરક્ષા સાધનોની ખરીદી વધારવા અને દ્વિપક્ષીય વેપાર સંબંધો વધારવાના મહત્વ પર ભાર મૂક્યો હતો.