કોમનવેલ્થ ગેમ્સની તૈયારીઓ શરૂ, મોટેરા સ્ટેડિયમ નજીક 29 મકાનનું ડિમોલિશન કરાયું

અમદાવાદઃ કોમનવેલ્થ ગેમ્સ 2023ની યજમાની અમદાવાદને મળી છે તેમજ ઓલિમ્પિકનું આયોજન પણ અમદાવાદમાં કરવાના પ્રયાસો ચાલી રહ્યાં છે. જેને લઈને અમદાવાદમાં એએમસી તંત્ર હરકતમાં આવ્યું છે અને મોટેરા વિસ્તારમાં નરેન્દ્ર મોદી સ્ટેડિયમની નજીક આવેલા અડચણરૂપ મકાનોને દૂર કરવાની કવાયત શરૂ કરી છે. આજે સવારથી જ મનપાની ટીમ દ્વારા ચુસ્ત બંદોબસ્ત વચ્ચે ડિમોલિશનની કામગીરી શરૂ કરવામાં આવી હતી.

પ્રાપ્ત માહિતી મુજબ, મોટેરાના બળદેવનગર વિસ્તારમાં આવેલા 29 જેટલા મકાનો ટીપી રોડની કપાતમાં આવતા હોવાથી AMC દ્વારા મકાન માલિકોને પૂર્વે નોટિસ આપવામાં આવી હતી. જોકે, સ્થાનિકોએ આ મામલે રાજ્યની વડી અદાલતમાં અરજી કરી હતી. હાઈકોર્ટે સુનાવણી દરમિયાન અરજી ના મંજુર રાખતા મનપા તંત્ર દ્વારા દબાણ દૂર કરવાની કાર્યવાહી તેજ બનાવવામાં આવી હતી. પશ્ચિમ ઝોન એસ્ટેટ વિભાગ દ્વારા આજે વહેલી સવારથી જ 4 હિટાચી મશીન, 2 JCB અને સ્ટાફની મદદથી મકાનો તોડવાની કામગીરી શરૂ કરવામાં આવી હતી. ડિમોલિશન દરમ્યાન કાયદો-વ્યવસ્થા જળવાઈ રહે તે માટે મોટી સંખ્યામાં પોલીસ બંદોબસ્ત ગોઠવવામાં આવ્યો હતો. નરેન્દ્ર મોદી સ્ટેડિયમની પાછળ કરોડો રૂપિયાના ખર્ચે SVP એન્ક્લેવ વિકસાવવાનું હોવાથી આ આસપાસના વિસ્તારમાં રોડ અને ઈન્ફ્રાસ્ટ્રક્ચર ડેવલપમેન્ટનું કામ તેજ કરવામાં આવ્યું છે. અચેર ડેપોથી ટોરેન્ટ પાવર સુધી સીધો 24 મીટર પહોળાઈનો ટીપી રોડ ખુલ્લો કરવો જરૂરી હોવાથી બળદેવનગર અને સુભાષનગરના કુલ 29 મકાનો રસ્તામાં આવતા હતા. AMCના આ ઓપરેશન બાદ હવે મોટેરા અને આસપાસના વિસ્તારોમાં ઈન્ફ્રાસ્ટ્રક્ચર વિકાસના કામને વધુ ઝડપ મળશે તેવી ધારણા છે.