લખતર-વઢવાણ સ્ટેટ હાઈવે પર ભારે વિરોધ અને રજુઆતો બાદ ખાડાઓ પૂરાયા
- નર્મદાનું સાયફન બનાવવા માટે ઝમર ગામ નજીક રોડ તોડવામાં આવ્યો હતો,
- રોડ પરના ખાડાને લીધે અકસ્માતો સર્જાતા હતા,
- મોટા ખાડાઓ પર ડામર પાથરીને રોડ રિસફેસ કરાયો
સુરેન્દ્રનગરઃ વિરમગામના લખતર-વઢવાણ રાજ્યધોરી માર્ગ પર ઠેર ઠેર ખાડા પડ્યા હતા. ખાડાને લીધે વાહનચાલકોને ભારે મુશ્કેલી પડતી હતી. આ અંગે માર્ગ-મકાન વિભાગ સહિત જિલ્લા તંત્રને પણ રજુઆત કરવામાં આવતા દિવાળી પહેલા જ રોડ પરના ગાબડા પુરી દેવામાં આવતા વાહનચાલકોને રાહત થઈ છે.
લખતર-વઢવાણ સ્ટેટ હાઇવે ઉપર ઝમર ગામથી આગળનાં રસ્તે થોડા સમય પહેલા નર્મદાનું સાયફન બનાવવા માટે તોડાયેલો રોડ ઉપર મોટા ખાડાનાં કારણે અકસ્માત થવાનો ભય વાહનચાલકોમાં હતો. તેથી આ રોડ ઉપરના મોટા ખાડાઓ તાત્કાલિક બુરવા માટે માંગ ઊઠી હતી. જે અંગેના અહેવાલ પ્રસિદ્ધ થતા જ તંત્ર દ્વારા કાર્યવાહી હાથ ધરવામાં આવી છે.
રાજ્ય સરકાર દ્વારા પ્રજાની તાતી જરૂરિયાત ગણાતા રોડ-રસ્તાનાં કામ સરખા અને મજબૂત કરવા આદેશ આપવામાં આવે છે. ત્યારે રોડનાં રીપેરીંગ માટે આપેલા કામો કેટલી હલકી ગુણવત્તાથી રીપેર થાય છે તેનો નાદાર નમૂનો લખતર-વઢવાણ સ્ટેટ હાઇવે ઉપર ઝમર ગામથી થોડે આગળ આવેલ પેપરમિલ નજીકમાં પડેલ મોટા ખાડાઓ પૂરો પાડતા હતા. જે ખાડાઓ નર્મદાની કેનાલની સાયફન નીચેથી કાઢતા રોડ ઉપર પડ્યા હતા. આ જગ્યાએ ત્રણથી વધુ મોટા ખાડા, લગભગ ત્રણ - ચાર ફૂટના લાંબા ખાડાઓ આ જગ્યાએ પડેલા હોવાના અહેવાલ પ્રસિદ્ધ થયા હતા. ત્યારે આ અહેવાલ પ્રસિદ્ધ થતા જ તંત્ર સફાળુ જાગ્યું હતું. તંત્રએ કાર્યવાહી કરતા આ જગ્યાએ ખાડાઓ બુર્યા હતા. ખાડાઓ બૂરવામાં આવતા લોકોને રાહત મળી હતી.