ધ્રાંગધ્રામાં પોલીસ કોન્સ્ટેબલ રૂપિયા 30.000ની લાંચ લેતા રંગેહાથ પકડાયો
- દુષ્કર્મ અને પોક્સોના કેસમાં મદદ કરવા માટે લાંચની માગ કરી હતી
- કોન્સ્ટેબલ પીઆઈના રાઈટર તરીકે ફરજ બજાવતો હતો
- એસીબીએ વધુ તપાસ માટે ફરિયાદી અને કોન્સ્ટેબલને સુરેન્દ્રનગર લઈ જવાયા
સુરેન્દ્રનગરઃ જિલ્લાના ધ્રાંગધ્રા સિટી પોલીસ મથકના પોલીસ કોન્સ્ટેબલ મોગીલાલ પઢીયારને એસીબીએ ₹30,000ની લાંચ લેતા રંગેહાથ ઝડપી પાડતા પોલીસ બેડામાં ફફડાટ વ્યાપી ગયો હતો. પોલીસ કોન્સ્ટેબલે દુષ્કર્મ અને પોક્સો હેઠળ નોંધાયેલ કેસમાં આરોપીને મદદ કરવાના બદલામાં આ લાંચની માંગણી કરી હતી. પણ ફરિયાદી લાંચ આપવા માગતા ન હોવાથી એસીબીમાં ફરિયાદ નોંધાવી હતી.
આ બનાવની વિગત એવી છે કે, પીઆઈના રાઈટર તરીકે ફરજ બજાવતા મોગીલાલ પઢીયારે અરજદાર પાસે ચાલી રહેલા જૂના કેસમાં મદદ કરવા અને હાલ કોર્ટમાં ચાલતા કેસમાં સહાય કરવા માટે ₹30,000ની લાંચ માંગી હતી. ફરિયાદી લાંચ આપવા માંગતા ન હોવાથી તેમણે સુરેન્દ્રનગર એસીબીનો સંપર્ક કર્યો હતો. જેના આધારે એસીબી દ્વારા છટકું ગોઠવવામાં આવ્યું હતું. આ છટકા દરમિયાન, ધ્રાંગધ્રાના આંબેડકર સર્કલ નજીક ડીસીડબલ્યુ સર્કલ પાસે આવેલી પીજીવીસીએલ કચેરીના ગેટ પાસે પોલીસકર્મી મોગીલાલ પઢીયાર લાંચની રકમ સ્વીકારતા રંગેહાથ ઝડપાઈ ગયા હતા. એસીબી દ્વારા આ મામલે વધુ કાયદેસરની કાર્યવાહી હાથ ધરવામાં આવી છે. ફરિયાદી અને લાંચ લેનાર પોલીસ કર્મચારીને વધુ કાર્યવાહી માટે સુરેન્દ્રનગર એસીબી કચેરી ખાતે લઈ જવામાં આવ્યા છે.
