પાદરાના પાટોદ નજીક ફાર્મ હાઉસમાં લૂંટ કેસના ચાર શખસોને પોલીસે દબોચી લીધા

• ફાર્મ હાઉસમાં પાંચથી સાત જેટલા લુંટારાઓ હથિયારો સાથે ઘૂસ્યા હતા,
• લૂંટારૂ શખસોએ દંપત્તી અને તેના માતા-પિતા પર હુમલો કરીને 83 હજારની લૂંટ કરી હતી,
• મોબાઇલ લોકેશન ટ્રેસિંગ ટેકનોલોજી દ્વારા લૂંટારૂ શખસો પકડાયા

વડોદરાઃ  જિલ્લાના પાદરા તાલુકાના પાટોદ ગામની સીમમાં આવેલા ફાર્મ હાઉસમાં ગઈ તા. 22મી નવેમ્બરે રાતના સમયે બુકાનીધારી લુંટારુઓએ ત્રાટકીને દંપતી સહિત તેમના માતા-પિતાના બાનમાં લઈને ધમકી આપીને સોના ચાંદીના દાગીના અને રોકડ રકમ મળી રૂ. 83 હજારની મતાની લૂંટ ચલાવી હતી, ત્યારે આ લૂંટારુઓને પકડવા માટે પાદરા પોલીસ સહિતના એલસીબીની ટીમ દ્વારા શોધખોળ કરીને લૂંટારૂ ગેંગ પૈકીના 4 આરોપીઓને ઝડપી પાડ્યા છે.

વડોદરા જિલ્લાના પાદરા તાલુકાના પાટોદ ગામ પાસે આવેલા ફાર્મ હાઉસમાં રખેવાળી કરવા માટે મગનભાઇ પ્રવિણભાઇ ચૌહાણ તેમની પત્ની રહેતા હતા. દરમિયાન યુવકના માતા પિતા તેમને મળવા 22 નવેમ્બરના રોજ આવ્યાં હતા. ત્યારે દંપતી સહિત તેમના માતા પિતા રાત્રીના સમયે ભાજન લીધા બાદ ઘરમાં ઉંઘી ગયા હતા. ત્યારે મોડી રાત્રીના સમયે ફાર્મ હાઉસની કમ્પાઉન્ડ વોલ કુદીને પાંચથી સાત જેટલા લૂંટારાઓ હથિયારો સાથે ધસી આવ્યા હતા. અને હિન્દી ભાષા બોલતા આ લૂંટારુઓએ મગનભાઇ ચૌહાણ પર હુમલો કર્યો હતો. ત્યારબાદ તેમની પાસે સોના ચાંદીના દાગીના અને રોકડ રકમ મળી રૂ. 83 હજારના મતાની ફિલ્મી ઢબે લુંટ ચલાવી લૂંટારુઓ ફરાર થઇ ગયો હતો. આ ઘટનાના પગલે પાદરા પોલીસ સહિત એલસીબી ટીમો એક્ટિવ થઇ ગઇ હતી અને ઉચ્ચ અધિકારીઓ પણ ઘટના સ્થળ પર દોડી આવ્યાં હતા. આ મામલે પાદરા પોલીસ સ્ટેશનમાં ફરિયાદ નોંધાવવામાં આવી હતી. પોલીસની વિવિધ ટીમોએ લૂંટારુઓને જેર કરવા કામે લાગી હતી અને સીસીટીવી ફૂટેજ, ટેકનિકલ એનાલિસિસ તેમજ મોબાઇલ લોકેશન ટ્રેસિંગ ટેકનોલોજી દ્વારા દાહોદ અને મધ્ય પ્રદેશના 4 લૂંટારૂઓને ઝડપી પાડવામાં આવ્યા છે. જેમાં બે આરોપી વડોદરાના સિટી વિસ્તારમાંથી તથા અન્યે બેને દાહોદમાંથી દબોચી લેવાયા છે.