પીએમ મોદીએ એરપોર્ટ ઉપર જ અધિકારીઓ સાથે વિમાન દૂર્ઘટના મામલે બેઠક કરી

અમદાવાદઃ વડાપ્રધાન નરેન્દ્ર મોદી શુક્રવારે અમદાવાદમાં તે સ્થળે પહોંચ્યા જ્યાં ગુરુવારે એર ઇન્ડિયાનું વિમાન ક્રેશ થયું હતું. આ અકસ્માતમાં 265 લોકોના મોત થયા હતા. અધિકારીઓએ જણાવ્યું હતું કે વડાપ્રધાન અહીં સરદાર વલ્લભભાઈ પટેલ એરપોર્ટ પર પહોંચ્યા હતા અને ત્યાંથી સીધા મેઘનાની નગર વિસ્તારમાં અકસ્માત સ્થળ પર ગયા હતા. ગુજરાતના મુખ્યમંત્રી ભૂપેન્દ્ર પટેલ પણ તેમની સાથે છે.

પ્રધાનમંત્રી નરેન્દ્ર મોદીએ શુક્રવારે એર ઇન્ડિયા AI-171 અકસ્માતમાં બચી ગયેલા લોકોને મળવા અમદાવાદ સિવિલ હોસ્પિટલની મુલાકાત લીધી હતી. તેમની સાથે ગુજરાતના મુખ્યમંત્રી ભૂપેન્દ્ર પટેલ, કેન્દ્રીય નાગરિક ઉડ્ડયન મંત્રી રામ મોહન નાયડુ, કેન્દ્રીય રાજ્યમંત્રી મુરલીધર મોહોલ અને રાજ્ય ગૃહમંત્રી હર્ષ સંઘવી પણ હતા. ઘાયલો સાથે સમય વિતાવ્યા અને ચાલી રહેલી સારવારની સમીક્ષા કર્યા પછી પ્રધાનમંત્રી હોસ્પિટલ છોડીને ગયા હતા.

પ્રધાનમંત્રી નરેન્દ્ર મોદી વિમાન દુર્ઘટના અંગે અમદાવાદ એરપોર્ટ પર અધિકારીઓ સાથે બેઠક કરી હતી. આ બેઠકમાં ગુજરાતના મુખ્યમંત્રી, ગૃહમંત્રી અને કેન્દ્રીય ઉડ્ડયન મંત્રીનો સમાવેશ થાય છે. આ સમીક્ષા બેઠકમાં પીએમ મોદી અધિકારીઓ પાસેથી વિગતવાર અહેવાલો લઈ રહ્યા છે અને આગળની કાર્યવાહી યોજના પર ચર્ચા થઈ રહી છે.

ગુરુવારે બપોરે સરદાર વલ્લભભાઈ પટેલ આંતરરાષ્ટ્રીય એરપોર્ટ પરથી ઉડાન ભર્યાના થોડા સમય પછી મેઘનાની નગર વિસ્તારમાં આવેલા મેડિકલ કોલેજ કેમ્પસમાં બોઇંગ 787 ડ્રીમલાઇનર (AI171) વિમાન ક્રેશ થયું હતું. તેમાં ગુજરાતના ભૂતપૂર્વ મુખ્યમંત્રી વિજય રૂપાણી સહિત 242 મુસાફરો અને ક્રૂ સભ્યો હતા. આ અકસ્માતમાં ફક્ત એક જ મુસાફર બચી ગયો હતો. વિમાનમાં બે પાઇલટ સહિત 10 ક્રૂ સભ્યો પણ હતા. એરપોર્ટની બહાર બીજે મેડિકલ કોલેજ કેમ્પસમાં માર્યા ગયેલા લોકોમાં ચાર MBBS વિદ્યાર્થીઓ અને એક ડૉક્ટરની પત્નીનો પણ સમાવેશ થાય છે.