પેરિસ પેરાલિમ્પિક્સ: હરવિંદર સિંહે ગોલ્ડ મેડલ જીતી ઈતિહાસ રચ્યો

• હરવિંદર સિંહે પુરુષોની વ્યક્તિગત તીરંદાજી રિકર્વ ઓપન ફાઇનલમાં ગોલ્ડ મેડલ
• વડાપ્રધાન નરેન્દ્ર મોદીએ મેડલ વિજેતાઓને શુભેચ્છાઓ પાઠવી

નવી દિલ્હીઃ પેરિસ પેરાલિમ્પિક્સ 2024 હરવિંદર સિંહે પુરુષોની વ્યક્તિગત તીરંદાજી રિકર્વ ઓપન ફાઇનલમાં ગોલ્ડ મેડલ જીતીને ઇતિહાસ રચ્યો હતો. પેરાલિમ્પિક્સ અથવા ઓલિમ્પિકમાં ગોલ્ડ મેડલ જીતનાર ભારતનો પ્રથમ તીરંદાજ બન્યો. આ પછી, મેન્સ ક્લબ થ્રો F-51ની ફાઇનલમાં, ધરમવીરે એશિયન રેકોર્ડ તોડીને 34.92 મીટરનું અંતર ફેંકીને ગોલ્ડ મેડલ જીત્યો.

આ જ ઈવેન્ટમાં પ્રણવ સુરમાએ 34.59 મીટરનું અંતર ફેંકીને સિલ્વર મેડલ જીત્યો હતો. અગાઉના દિવસે, વિશ્વ ચેમ્પિયન સચિન સરગેરાવ ખિલારીએ પુરુષોના શોટ પુટ F-46 કેટેગરીમાં 16.32 મીટરના એશિયન રેકોર્ડ થ્રો સાથે સિલ્વર મેડલ જીત્યો હતો.

પ્રધાનમંત્રી નરેન્દ્ર મોદીએ પણ મેડલ વિજેતાઓને પેરાલિમ્પિક્સની એક જ આવૃત્તિમાં સૌથી વધુ મેડલ જીતવા બદલ અભિનંદન પાઠવ્યા છે. એક સોશિયલ મીડિયા પોસ્ટમાં પીએમ મોદીએ કહ્યું કે આ રમત પ્રત્યે ભારતીય રમતવીરોના સમર્પણ, ઉત્સાહ અને મજબૂત ઇચ્છાશક્તિને દર્શાવે છે.

આજે, પેરાલિમ્પિક ગેમ્સના આઠમા દિવસે, ભારતીય ટીમ શાનદાર પ્રદર્શન સાથે ઝુંબેશને સમાપ્ત કરવા માટે તીરંદાજી અભિયાનમાં પ્રવેશ કરશે, જ્યારે સુવર્ણ ચંદ્રક વિજેતા હરવિંદર સિંહ મિશ્ર ટીમ રિકર્વ ઓપન ઈવેન્ટમાં તેના બીજા મેડલ માટે પડકાર આપશે.