ન્યૂઝીલેન્ડ સામેની મેચમાં પાકિસ્તાની બેસ્ટમેન ઈમામ ઉલ હક થયો ઈજાગ્રસ્ત

ન્યૂઝીલેન્ડ અને પાકિસ્તાન વચ્ચે રમાઈ રહેલી ત્રણ મેચની ODI શ્રેણીની ત્રીજી મેચમાં હાઈ વોલ્ટેજ ડ્રામા જોવા મળ્યો હતો. પાકિસ્તાનના ઓપનર ઇમામ ઉલ હક ઇજાગ્રસ્ત થયા બાદ નિવૃત્ત થયો હતો. મેચ દરમિયાન, સીધા ફેંકવામાં આવતા, બોલ ઇમામના હેલ્મેટમાં ઘૂસી ગયો અને તેના ચહેરા પર વાગ્યો હતો.

ખરેખર, મેચ દરમિયાન, 265 રનના લક્ષ્યનો પીછો કરતી વખતે ઇમામ ઉલ હક અને અબ્દુલ્લા શફીક મેદાન પર આવ્યા હતા. વિલિયમ ઓ'રોર્ક ઇનિંગની ત્રીજી ઓવર ફેંકી રહ્યા હતા. ઓવરના ત્રીજા બોલ પર, ઇમામે ઓફ સાઈડ પર રમીને રન લેવાનો પ્રયાસ કર્યો હતો. નોન-સ્ટ્રાઈકર એન્ડ પરનો થ્રો સીધો ઇમામના હેલ્મેટ પર વાગ્યો અને બોલ હેલ્મેટની અંદર ઘૂસી ગયો હતો. આના કારણે, ઇમામ ઘાયલ થયો અને હેલ્મેટ કાઢીને અને મોં પર હાથ રાખ્યા પછી પીડાથી કણસતા જોવા મળ્યો હતો. તબીબી ટીમે તેમની સારવાર કરવાનો પ્રયાસ કર્યો, પરંતુ તેઓ ફરીથી બેટિંગ કે ચાલવાની સ્થિતિમાં ન હતો. આ પછી, એક મીની એમ્બ્યુલન્સ બોલાવવામાં આવી અને તેને તેમાં લઈ જવામાં આવ્યો હતો. તે રિટાયર્ડ હર્ટ થયો અને બાદમાં તેને કન્કશન રિપ્લેસમેન્ટ કરાવાયું. ત્યારબાદ ઇમામ ફક્ત એક જ રન બનાવી શક્યો હતો.

ઉસ્માન ખાન ઇમામના કોન્કશન સબસ્ટિટ્યુટ તરીકે ત્રીજા નંબરે બેટિંગ કરવા આવ્યો અને 17 બોલમાં 12 રન બનાવ્યા હતા. આ દરમિયાન, શફીકે 33 રન અને બાબર આઝમે 50 રન બનાવ્યા હતા. મોહમ્મદ રિઝવાન 37રન અને તૈયબ તાહિર 33 રન બનાવી શક્યા હતા. ઇનિંગ દરમિયાન, 39મી ઓવરમાં સ્ટેડિયમમાં બ્લેકઆઉટ થઈ ગયું. ખરેખર, વરસાદને કારણે આ મેચ 42 ઓવરની કરવામાં આવી હતી.

39મી ઓવરમાં, જેકબ ડફીએ ચોથો બોલ ફેંક્યો અને તેને હાથથી છોડ્યો કે તરત જ બધી ફ્લડલાઇટ્સ બંધ થઈ ગઈ અને મેદાન અંધારામાં ડૂબી ગયું. પછી તૈયબ તાહિર સ્ટ્રાઈક પર હતો અને તે બોલની લાઇનથી દૂર ગયો. કોઈને ખબર નહોતી કે બોલ ક્યાં ગયો અને કદાચ બોલ બાઉન્ડ્રી લાઇન પાર કરી ગયો હતો. પાંચ મિનિટ પછી ફ્લડલાઇટ ફરી ચાલુ થઈ અને રમત શરૂ થઈ. રમત શરૂ થતાં જ તૈયબ તાહિર આઉટ થઈ ગયો. આ બંને ઘટનાઓ પહેલી વાર મેચ દરમિયાન જોવા મળી હતી.