પાકિસ્તાન દ્વારા હાફિઝ સઈદ અને મસૂદ અઝહર જેવા કુખ્યાત આતંકવાદીઓને ભારતને સોંપવામાં આવેઃ રાજનાથ સિંહ

ગાંધીનગરઃ સંરક્ષણ પ્રધાન રાજનાથ સિંહે પાકિસ્તાનને ચેતવણી આપી દીધી કે જો તે ભારત સામે કોઈ આતંકવાદી કાર્યવાહી કરશે, તો તેને તેના પરિણામોનો સામનો કરવો પડશે અને હારનો સામનો કરવો પડશે. તેમણે કહ્યું કે ભારત આતંકવાદનો નાશ કરવા માટે તમામ પ્રયાસો કરશે.

સંરક્ષણ પ્રધાને કહ્યું કે, સમગ્ર વિશ્વ ભારતના નાગરિકોને આતંકવાદથી બચાવવાના અધિકારને સમર્થન આપે છે. તેમણે ભારપૂર્વક જણાવ્યું કે પાકિસ્તાને પોતાના હાથે જ આતંકવાદના બીજ ઉખાડી દેવા જોઈએ, જે તેની ધરતી પર ઉગી રહ્યા છે. તેમણે માંગ કરી કે હાફિઝ સઈદ અને મસૂદ અઝહર જેવા કુખ્યાત આતંકવાદીઓને ભારતને સોંપવામાં આવે. તેઓ આજે ગોવા દરિયાકાંઠે ભારતના પ્રથમ સ્વદેશી વિમાનવાહક જહાજ INS વિક્રાંત પર અધિકારીઓ અને નૌકાદળના કર્મચારીઓને સંબોધિત કરી રહ્યા હતા.

સંરક્ષણ પ્રધાને કહ્યું કે ઓપરેશન સિંદૂર માત્ર લશ્કરી કાર્યવાહી નથી, પરંતુ આતંકવાદ સામે ભારતનો સીધો હુમલો છે. તેમણે કહ્યું કે જો પાકિસ્તાન કોઈ ખરાબ અને અનૈતિક કૃત્ય કરશે તો તેને ભારતીય નૌકાદળની ફાયરપાવરનો સામનો કરવો પડશે.

રાજનાથસિંહે ભારપૂર્વક જણાવ્યું કે પાકિસ્તાને સમજવાની જરૂર છે કે સ્વતંત્રતા પછીથી જે રીતે તે કરી રહ્યું છે તે રીતે આતંકવાદને પ્રોત્સાહન આપવાનો સમય હવે પૂરો થઈ ગયો છે. તેમણે કહ્યું કે પાકિસ્તાની ધરતી પરથી ખુલ્લેઆમ ભારત વિરોધી પ્રવૃત્તિઓ કરવામાં આવી રહી છે અને ભારત આતંકવાદીઓ સામે જમીન અને સમુદ્ર બંને જગ્યાએ તમામ પ્રકારના ઓપરેશન શરૂ કરવા માટે સંપૂર્ણપણે સ્વતંત્ર છે. ઓપરેશન સિંદૂર દરમિયાન ભારતીય નૌકાદળના યોગદાનની પ્રશંસા કરતા રાજનાથ સિંહે કહ્યું કે, શક્તિશાળી કેરિયર બેટલ ગ્રૂપે ખાતરી કરી કે પાકિસ્તાન નૌકાદળ કોઈ પ્રગતિ ન કરી શકે.