બિહારમાં ફિર એક બાર..! નીતિશ કુમારના નેતૃત્વ હેઠળ એનડીએ જોડાણે મહાગઠબંધનને પાછળ છોડ્યું
પટણા, 14 નવેમ્બર, 2025ઃ NDA alliance under the leadership of Nitish Kumar way ahead in Bihar બિહાર વિધાનસભા ચૂંટણીમાં વધુ એક વખત એનડીએ જોડાણ જીત તરફ આગળ વધી રહ્યું હોય એવું જણાય છે. સવારે 11 વાગ્યા સુધીની મતગણતરીના ટ્રેન્ડમાં એનડીએ જોડાણ 190 કરતાં વધુ બેઠકો ઉપર આગળ હોવાનું જાણવા મળે છે. જ્યારે આરજેડી-કોંગ્રેસ સહિત પક્ષોના મહગઠબંધનને નિરાશા મળી રહી છે એવું મતગણતરીના ત્રણ કલાક પછી પ્રતિત થાય છે. બીજી તરફ, રાજ્યમાં બહુ મોટી આશા જગાવનાર પ્રશાંત કિશોરના પક્ષનું પ્રદર્શન સાવ નિરાશાજનક રહ્યું છે.
6 અને 11 નવેમ્બરે યોજાયેલા મતદાન બાદ આજે શુક્રવારે સવારે આઠ વાગ્યે મતગણતરી શરૂ થઈ હતી. પ્રારંભમાં જે વલણ આવ્યાં હતાં તે અનુસાર એનડીએ અને મહાગઠબંધન બંને જોડાણ લગભગ કટોકટ ચાલતા હતા, પરંતુ બે કલાકની ગણતરી બાદ એનડીએ ઘણું આગળ નીકળી ગયું. હાલ ત્રણ કલાક પછી નીતિશ કુમારના જનતાદળ યુનાઈટેડ અને ભાજપના જોડાણને 190 કરતાં વધુ બેઠકો ઉપર લીડ મળી છે. તેની સામે તેજસ્વી યાદવના આરજેડી અને કોંગ્રેસનું જોડાણ 48 બેઠકો ઉપર આગળ હોવાનું જાણવા મળે છે.
નોંધપાત્ર છે કે, ચૂંટણી પહેલાં યોજાયેલા ઓપિનિયન પોલ તેમજ 11મી નવેમ્બરે યોજાયેલા એક્ઝિટપોલમાં મોટાભાગે એનડીએના વિજયની સંભાવના વ્યક્ત કરવામાં આવી હતી. જોકે કેટલીક એજન્સીઓ તેમજ કેટલીક સમાચાર ચેનલોએ આરજેડીના નેતૃત્વ હેઠળના મહાગંઠબંધનની જીતની સંભાવના પણ વ્યક્ત કરી હતી.
બિહારમાં કદાચ ઇતિહાસમાં પ્રથમ વખત રેકોર્ડ મતદાન થયું હતું અને તેમાંય મહિલા મતદારોએ આ વખતની ચૂંટણીમાં પુરુષો કરતાં સરેરાશ વધુ મતદાન કરીને એક નવો ટ્રેન્ડ સ્થાપિત કર્યો હતો. રાજ્યમાં પહેલા તબક્કામાં છઠ્ઠી નવેમ્બરે 64.66 % ટકા મતદાન નોંધાયું હતું જ્યારે બીજા તબક્કામાં 11 નવેમ્બરે 66.91% મતદાન નોંધાયું હતું. ચૂંટણીપંચના જણાવ્યા અનુસાર 1951 પછી સૌપ્રથમ વખત આટલી મોટી સંખ્યામાં મતદાન થયું હતું. બિહારમાં આ વખતે મહિલા મતદારોએ પુરુષોની સરખામણીમાં સરેરાશ 7થી 8 ટકા વધુ મતદાન કર્યું હોવાનું ચૂંટણીપંચના આંકડા જણાવે છે. અને તેથી કદાચ આજે સાંજ સુધીમાં જે કોઈ પરિણામ આવે તેમાં મહિલા મતદારો નિર્ણાયક હશે.
