હવે પાણીનો હથિયાર તરીકે ઉપયોગ થતો જોઈ રહ્યાં છીએઃ શાહબાઝ શરીફ

નવી દિલ્હીઃ પહેલગામમાં થયેલા આતંકવાદી હુમલા બાદ ભારત અને પાકિસ્તાન વચ્ચેના સંબંધ વધારે તંગ બન્યાં છે. દરમિયાન તાજિકિસ્તાનમાં એક કાર્યક્રમને સંબોધિત કરતી વખતે, શાહબાઝ શરીફે સિંધુ જળ સંધિની તુલના ગાઝા સંકટ સાથે કરી હતી. તેમણે જણાવ્યું હતું કે, ગાઝામાં શસ્ત્રોના ઉપયોગથી થતા ઘા દુનિયા જોઈ રહી છે. એવું લાગે છે કે એક ઘા પૂરતો નથી. હવે પાણીનો હથિયાર તરીકે ઉપયોગ થતો જોઈ રહ્યાં છીએ.

પાકિસ્તાની અખબારના અહેવાલ મુજબ, શાહબાઝ શરીફે કહ્યું કે ભારત પાણીનો ઉપયોગ હથિયાર તરીકે કરી રહ્યું છે, પરંતુ પાકિસ્તાન ભારતને સિંધુ જળ સંધિ પર લાલ રેખા પાર કરવા દેશે નહીં. શાહબાઝ શરીફે તાજિકિસ્તાનની રાજધાની દુશાંબેમાં હિમનદીઓના સંરક્ષણ પર આયોજિત આંતરરાષ્ટ્રીય પરિષદમાં આ વાતો કહી.

શાહબાઝ શરીફે જણાવ્યું હતું કે, "સિંધુ જળ સંધિને સ્થગિત કરવાનો ભારતનો એકપક્ષીય અને ગેરકાયદેસર નિર્ણય, જે સિંધુ બેસિનના પાણીની વહેંચણીનું સંચાલન કરે છે, તે ચિંતાજનક છે. લાખો લોકોના જીવનને રાજકીય લાભ માટે બંધક બનાવવું જોઈએ નહીં. પાકિસ્તાન આવું થવા દેશે નહીં. અમે ક્યારેય લાલ રેખા પાર કરવા દઈશું નહીં."

વડાપ્રધાન શાહબાઝે કહ્યું, "આજે દુનિયા ગાઝામાં પરંપરાગત શસ્ત્રોના ઉપયોગના નવા નિશાનનો સામનો કરી રહી છે, જેના કારણે ઊંડા ઘા થયા છે. હવે પાણી રોકીને બીજું એક ખતરનાક હથિયારનો ઉપયોગ થઈ રહ્યો છે." પહેલગામ આતંકવાદી હુમલા પછી, ભારતે સિંધુ જળ સંધિને સ્થગિત કરવા સહિત ઘણા કઠિન નિર્ણયો લીધા હતા. પાકિસ્તાની પીએમએ તેમના આખા ભાષણમાં એક પણ ઉલ્લેખ કર્યો ન હતો કે ભારતે આ કઠિન પગલું કેમ લીધું.

સિંધુ જળ સંધિ ભારત અને પાકિસ્તાન વચ્ચે એક ઐતિહાસિક કરાર છે. તેના પર 1960 માં હસ્તાક્ષર કરવામાં આવ્યા હતા. તેના પર તત્કાલીન વડા પ્રધાન જવાહરલાલ નહેરુ અને પાકિસ્તાનના તત્કાલીન રાષ્ટ્રપતિ અયુબ ખાને હસ્તાક્ષર કર્યા હતા. આમાં વિશ્વ બેંકે મધ્યસ્થીની ભૂમિકા ભજવી હતી. સંધિનો ઉદ્દેશ્ય બંને દેશો વચ્ચે નદીઓના પાણી વહેંચણી માટેની શરતો નક્કી કરીને વિવાદનો અંત લાવવાનો હતો. સિંધુ નદી પ્રણાલીમાં કુલ છ નદીઓનો સમાવેશ થાય છે, જેમાં ત્રણ પૂર્વીય નદીઓ રાવી, બિયાસ, સતલજ અને ત્રણ પશ્ચિમી નદીઓ સિંધુ, ઝેલમ, ચિનાબનો સમાવેશ થાય છે.