કુખ્યાત હથિયાર સપ્લાયર સલીમ શેખને નેપાળથી ભારત લવાયો, દિલ્હી પોલીસે શરૂ કરી તપાસ

નવી દિલ્હીઃ દિલ્હી પોલીસ સ્પેશિયલ સેલની ટીમ સુરક્ષા એજન્સીઓ સાથે મળીને ભારતના સૌથી મોટા હથિયાર સપ્લાયર શેખ સલીમ ઉર્ફે સલીમ પિસ્તોલને નેપાળથી ભારત લઈ આવી હોવાનું જાણવા મળે છે. સલીમની 9 ઓગસ્ટના રોજ નેપાળમાં ધરપકડ કરવામાં આવી હતી. મળતી માહિતી મુજબ, તેને રાજધાનીમાં દિલ્હી પોલીસ સ્પેશિયલ સેલ ઓફિસમાં રાખવામાં આવ્યો છે.

પ્રાપ્ત માહિતી અનુસાર સૌથી મોટા હથિયાર સપ્લાયર સલીમ 2018 થી ફરાર હતો. તેણે ભારતમાં ગેંગસ્ટરોને તુર્કી બનાવટની ઝિગાના પિસ્તોલ સપ્લાય કરી હતી. ઘણા વર્ષો સુધી તે પાકિસ્તાનથી આધુનિક હથિયારોની દાણચોરી કરીને ગેંગસ્ટરોને સપ્લાય કરતો રહ્યો. 2018 માં દિલ્હી પોલીસે તેને પહેલી વાર પકડ્યો હતો, પરંતુ જામીન મળ્યા બાદ તે વિદેશ ભાગી ગયો હતો.

એજન્સીઓ અનુસાર, સલીમના પાકિસ્તાનની ગુપ્તચર એજન્સી ISI અને અંડરવર્લ્ડ ડોન દાઉદ ઇબ્રાહિમના નેટવર્ક સાથે ઊંડા સંબંધો હતા. તે સિદ્ધુ મૂસેવાલા હત્યા કેસના આરોપીનો માર્ગદર્શક પણ માનવામાં આવે છે. તેનું નામ બાબા સિદ્દીકી હત્યા કેસમાં પણ સામે આવ્યું છે. તેણે લોરેન્સ બિશ્નોઈ, હાશિમ બાબા જેવા કુખ્યાત ગેંગસ્ટરોને પણ હથિયારો સપ્લાય કર્યા હતા.

ફ્રી પ્રેસ જર્નલમાં પ્રકાશિત થયેલા એક અહેવાલ મુજબ, સલીમ પિસ્તોલનું વાસ્તવિક ઘર દિલ્હીના જાફરાબાદમાં છે. સલીમે ધોરણ 8 પછી અભ્યાસ છોડી દીધો અને ડ્રાઇવર તરીકે કામ કરવાનું શરૂ કર્યું હતું. તે 2000 માં ગુનાની દુનિયામાં પ્રવેશ્યો, જ્યારે તે તેના સાથી મુકેશ ગુપ્તા ઉર્ફે કાકા સાથે વાહનો ચોરી કરતા પકડાયો હતો.

2011 માં, સલીમે જાફરાબાદમાં 20 લાખ રૂપિયાની મોટી સશસ્ત્ર લૂંટ ચલાવી હતી. 2013 માં, તે પોલીસ દ્વારા પકડાયો હતો અને IPC ની કલમ 395 અને 397 હેઠળ કેસ નોંધવામાં આવ્યો હતો. સમય જતાં, તે ગુનાની દુનિયામાં ઉપર ચઢી ગયો અને એક મોટો હથિયારોનો દાણચોર બન્યો, જેને આંતરરાષ્ટ્રીય સ્તરે પણ ઓળખ મળી હતી.

પોલીસ તપાસમાં જાણવા મળ્યું કે સલીમ તુર્કીમાં બનેલી ઝિગાના પિસ્તોલની દાણચોરીમાં ઊંડો સંડોવાયેલો હતો, જે ભારતમાં ગેંગસ્ટરોમાં ખૂબ જ લોકપ્રિય છે. તેની સાથે બુલંદશહેરના ખુર્જાના બે ભાઈઓ હતા, જેઓ તેને પાકિસ્તાનથી ભારતમાં આ હથિયારો લાવવામાં મદદ કરતા હતા. પિસ્તોલના ભાગોને અલગ કરીને વાહનોના છુપાયેલા ભાગોમાં છુપાવવામાં આવ્યા હતા અને પછીથી તેને એક જ ટુકડામાં ભેગા કરવામાં આવ્યા હતા.