તમિલનાડુ વિધાનસભામાં રાષ્ટ્રગીતનું અપમાન! નારાજ રાજ્યપાલ ગૃહમાંથી નીકળી ગયા

ચેન્નાઈ: તમિલનાડુના રાજ્યપાલ આર. એન. રવિએ સોમવારે બંધારણ અને રાષ્ટ્રગીતના અપમાનથી નારાજ થઈને રાજ્ય વિધાનસભામાંથી વોકઆઉટ કર્યો હતો. રાજભવને આ માહિતી આપી હતી. રાજ્યપાલ રવિ પરંપરાગત સંબોધન કરવા ગૃહમાં આવ્યા હતા.

રાજ્યપાલ કાર્યાલયે સોશિયલ મીડિયા પ્લેટફોર્મ 'X' પર એક પોસ્ટમાં આરોપ લગાવ્યો છે કે રવિએ મુખ્યમંત્રી એમ.કે. સ્ટાલિન અને એસેમ્બલી સ્પીકર એમ અપ્પાવુને વારંવાર રાષ્ટ્રગીત ગાવા માટે અપીલ કરી હતી, પરંતુ તેઓએ તેમ કરવાનો ઇનકાર કર્યો હતો. તમિલનાડુ વિધાનસભામાં આજે ફરી એકવાર ભારતના બંધારણ અને રાષ્ટ્રગીતનું અપમાન કરવામાં આવ્યું છે.

પોસ્ટમાં કહેવામાં આવ્યું છે કે, “રાષ્ટ્રગીતનું સન્માન કરવું એ આપણા બંધારણમાં સમાવિષ્ટ પ્રથમ મૂળભૂત ફરજોમાંનું એક છે. તે રાજ્યપાલના સંબોધનની શરૂઆતમાં અને અંતમાં તમામ રાજ્યની વિધાનસભાઓમાં ગાવામાં આવે છે. આજે જ્યારે રાજ્યપાલ ગૃહમાં આવ્યા ત્યારે માત્ર તમિલ થાઈ વઝાથુ ગાવામાં આવ્યું હતું. રાજ્યપાલે ગૃહને તેની બંધારણીય ફરજની યાદ અપાવી અને ગૃહના નેતા, મુખ્યમંત્રી અને સ્પીકરને વારંવાર રાષ્ટ્રગીત ગાવાની અપીલ કરી. પરંતુ તેમણે અસંસ્કારી રીતે ઇનકાર કર્યો હતો.”

રાજભવને કહ્યું, “આ ગંભીર ચિંતાનો વિષય છે. બંધારણ અને રાષ્ટ્રગીતના આવા અપમાનને કારણે રાજ્યપાલે ગુસ્સામાં ગૃહ છોડી દીધું હતું.'' રાજભવન દ્વારા અપલોડ કરવામાં આવેલી પોસ્ટને થોડા સમય માટે હટાવી દેવામાં આવી હતી પરંતુ થોડા સમય પછી ફરીથી પોસ્ટ કરવામાં આવી હતી. ગયા વર્ષે, રવિએ માત્ર થોડી જ મિનિટોમાં ગૃહને તેમનું પરંપરાગત સંબોધન પૂરું કર્યું હતું.