નરેન્દ્ર મોદીને મોરિશિયસનું સર્વોચ્ચ સન્માન મેળવુંએ ભારતનાં નાગરિકો માટે ખુશીની ક્ષણ : અમિત શાહ

નવી દિલ્હીઃ મોરેશિયસના વડા પ્રધાન નવીન રામગુલામે મંગળવારે વડા પ્રધાન નરેન્દ્ર મોદીને દેશના સર્વોચ્ચ સન્માન, 'ધ ગ્રાન્ડ કમાન્ડર ઓફ ધ ઓર્ડર ઓફ ધ સ્ટાર એન્ડ કી ઓફ ધ ઈન્ડિયન ઓશન' થી સન્માનિત કર્યા છે. ભારત અને મોરેશિયસ વચ્ચે દ્વિપક્ષીય સંબંધોને મજબૂત બનાવવામાં અમૂલ્ય યોગદાન બદલ પીએમ મોદીને આ સન્માન આપવામાં આવ્યું હતું. મોરેશિયસના સર્વોચ્ચ નાગરિક સન્માન પ્રાપ્ત કરવા બદલ ઘણા નેતાઓએ પીએમ મોદીને અભિનંદન પાઠવ્યા છે.

કેન્દ્રીય ગૃહમંત્રી અમિત શાહે સોશિયલ મીડિયા પ્લેટફોર્મ ઈન્સ્ટાગ્રામ પર લખ્યું, "મોરેશિયસના સર્વોચ્ચ પુરસ્કાર 'ધ ગ્રાન્ડ કમાન્ડર ઓફ ધ ઓર્ડર ઓફ ધ સ્ટાર એન્ડ કી ઓફ ધ ઇન્ડિયન ઓશન' થી સન્માનિત થવા બદલ પીએમ નરેન્દ્ર મોદીને અભિનંદન. પીએમ મોદી માટે આ 21મો આંતરરાષ્ટ્રીય પુરસ્કાર તેમના વૈશ્વિક રાજકારણની બીજી માન્યતા છે, જે વસુધૈવ કુટુમ્બકમના પ્રાચીન મંત્ર સાથે આંતરરાષ્ટ્રીય સંબંધોને આકાર આપે છે. આ ભારતના દરેક નાગરિક માટે આનંદની ક્ષણ છે."

વડા પ્રધાન નરેન્દ્ર મોદી આ સન્માન મેળવનારા પ્રથમ ભારતીય છે, અને આ બીજા દેશ દ્વારા તેમને આપવામાં આવેલો 21મો આંતરરાષ્ટ્રીય પુરસ્કાર છે. આ પ્રસંગે મોરેશિયસના વડા પ્રધાન રામગુલામે કહ્યું કે મોદી આ પ્રતિષ્ઠિત સન્માન મેળવનારા પાંચમા વિદેશી નાગરિક છે.

મોરેશિયસના પોર્ટ લુઇસમાં ભારતીય સમુદાયને સંબોધિત કરતી વખતે પીએમ મોદીએ કહ્યું કે જ્યારે હું મોરેશિયસ આવું છું, ત્યારે મને એવું લાગે છે કે હું મારા પોતાના લોકો વચ્ચે આવ્યો છું. અહીંની હવામાં, અહીંની માટીમાં, અહીંના પાણીમાં પોતાનુંપણું અનુભવાય છે. અહીંની માટી આપણા પૂર્વજોના લોહી અને પરસેવાથી ભળી ગઈ છે. મોરેશિયસના લોકો, અહીંની સરકારે, મને તેમનું સર્વોચ્ચ નાગરિક સન્માન આપવાનું નક્કી કર્યું છે. હું તમારા નિર્ણયને નમ્રતાથી સ્વીકારું છું. આ ભારત અને મોરેશિયસ વચ્ચેના ઐતિહાસિક સંબંધો માટે આદર છે.