તુર્કી એરપોર્ટ પર છેલ્લા 40 કલાકથી 250થી વધુ ભારતીય મુસાફરો ફસાયા

લંડન-મુંબઈ વર્જિન એટલાન્ટિક ફ્લાઈટમાં સવાર 250થી વધુ મુસાફરો મુશ્કેલીનો સામનો કરી રહ્યા છે. આમાં મોટાભાગના ભારતીયો છે. તેઓ 40 કલાકથી વધુ સમયથી તુર્કીના દિયારબકીર એરપોર્ટ પર ફસાયેલા છે. આ મામલે એરલાઇનના પ્રવક્તાએ કહ્યું છે કે 2 એપ્રિલે લંડનથી મુંબઈ જતી ફ્લાઈટ VS358ને મેડિકલ ઈમરજન્સીના કારણે દિયારબાકીર એરપોર્ટ પર લેન્ડ કરવામાં આવી હતી. જોકે, લેન્ડિંગ બાદ પ્લેનમાં ટેક્નિકલ સમસ્યા સર્જાઈ હતી અને તેની તપાસ કરવામાં આવી રહી છે. વર્જિન એટલાન્ટિકના પ્રવક્તાએ કહ્યું કે, અમારા ગ્રાહકો અને ક્રૂની સુરક્ષા અમારી સર્વોચ્ચ પ્રાથમિકતા છે. અસુવિધા બદલ અમે દિલગીર છીએ. એકવાર મંજૂર થઈ ગયા પછી, અમે શુક્રવારે 4 એપ્રિલે સ્થાનિક સમય મુજબ 12:00 વાગ્યે મુંબઈ માટે દિયારબકીર એરપોર્ટથી પ્રસ્થાન કરીશું

એરલાઈને કહ્યું, "જો મંજૂરી ન મળે, તો અમે આવતીકાલે અમારા ગ્રાહકોને તુર્કીના અન્ય એરપોર્ટ પર વૈકલ્પિક ફ્લાઈટ દ્વારા મુંબઈ લઈ જવાની યોજના પર કામ કરી રહ્યા છીએ. વર્જિન એટલાન્ટિકે કહ્યું, "તે દરમિયાન, મુસાફરોને તુર્કીમાં રાતોરાત હોટેલમાં રહેવાની સગવડ અને ભોજન આપવામાં આવી રહ્યું છે. અમે સમસ્યાને ઠીક કરવા માટે તમામ શક્ય પ્રયાસો કરી રહ્યા છીએ. નવા અપડેટ્સ ઉપલબ્ધ થતાં જ અમે તમામ ગ્રાહકોને જાણ કરીશું.

પરિવારના સભ્યોએ સોશિયલ મીડિયા પર તસવીરો પોસ્ટ કરી હતી
ફસાયેલા મુસાફરો અને તેમના પરિવારના સભ્યોએ તેમની સમસ્યાઓ સોશિયલ મીડિયા પર પ્રકાશિત કરી છે. ઘણા લોકોએ ફરિયાદ કરી હતી કે એરપોર્ટ પર રાહ જોઈ રહેલા 250 થી વધુ મુસાફરો માટે એક જ શૌચાલય છે. એક મુસાફરે સમાચાર એજન્સી પીટીઆઈને જણાવ્યું કે મુસાફરોને ઠંડીથી બચાવવા માટે ધાબળા આપવામાં આવ્યા ન હતા.

ભારતીય દૂતાવાસ અને એરલાઈન્સનો પ્રતિભાવ
તુર્કીમાં ભારતીય દૂતાવાસે સક્રિય ભૂમિકા ભજવી છે અને એરલાઇન, દિયારબકીર એરપોર્ટ ડાયરેક્ટર અને તુર્કીના વિદેશ મંત્રાલયનો સંપર્ક કર્યો છે. દૂતાવાસે આ મામલે નિવેદન જારી કરીને કહ્યું કે મુસાફરોની યોગ્ય કાળજી લેવામાં આવી રહી છે. અમે આ સમસ્યાનો ઉકેલ લાવવા અને મુંબઈ માટે વૈકલ્પિક ફ્લાઇટની વ્યવસ્થા કરવા માટે અધિકારીઓ સાથે કામ કરી રહ્યા છીએ.