ટ્રમ્પના નવેસરથી વેપાર વાટાઘાટો શરૂ કરવાના આહ્વાન અંગે મોદીએ આપી પ્રતિક્રિયા

નવી દિલ્હીઃ પ્રધાનમંત્રી નરેન્દ્ર મોદીએ આજે બુધવારે (10 સપ્ટેમ્બર) ભારત અને યુનાઇટેડ સ્ટેટ્સ વચ્ચે વેપાર વાટાઘાટો ફરી શરૂ કરવાના યુએસ પ્રમુખ ડોનાલ્ડ ટ્રમ્પના નિવેદનનો સકારાત્મક પ્રતિભાવ આપ્યો, ભાર મૂક્યો કે આ ચર્ચાઓ "ભારત-અમેરિકા ભાગીદારીની અમર્યાદિત સંભાવનાઓને ખોલશે."

ટ્રમ્પે તેમના સોશિયલ મીડિયા પ્લેટફોર્મ ટ્રુથ સોશિયલ પર એક પોસ્ટમાં બંને દેશો વચ્ચેના વેપાર અવરોધોને દૂર કરવાના હેતુથી ચર્ચાઓ ફરી શરૂ કરવાની જાહેરાત કરી. ટ્રમ્પની ટિપ્પણી પર પ્રતિક્રિયા આપતા, પીએમ મોદીએ X પર પોસ્ટ કરી. ભારત-અમેરિકા સંબંધોની મજબૂતાઈની પુષ્ટિ કરી અને ચાલુ વેપાર સંવાદના પરિણામમાં વિશ્વાસ વ્યક્ત કર્યો.

પીએમ મોદીએ X પર પોસ્ટમાં જણાવ્યું કે, "ભારત અને અમેરિકા નજીકના મિત્રો છે. મને વિશ્વાસ છે કે આપણી વેપાર વાટાઘાટો ભારત-અમેરિકા ભાગીદારીની અમર્યાદિત સંભાવનાઓને ખોલવાનો માર્ગ મોકળો કરશે. અમારી ટીમો આ ચર્ચાઓને શક્ય તેટલી વહેલી તકે પૂર્ણ કરવા માટે કામ કરી રહી છે. હું રાષ્ટ્રપતિ ટ્રમ્પ સાથે વાત કરવા માટે પણ આતુર છું. અમે બંને આપણા લોકો માટે ઉજ્જવળ, વધુ સમૃદ્ધ ભવિષ્ય સુરક્ષિત કરવા માટે સાથે મળીને કામ કરીશું,"

મંગળવારે (યુએસ સમય), ટ્રમ્પે જાહેરાત કરી કે તેમના વહીવટીતંત્રે ભારત સાથે વેપાર વાટાઘાટો ફરી શરૂ કરી છે. ટ્રુથ સોશિયલ પર પોસ્ટ કરીને જણાવ્યું કે, "મને જાહેરાત કરતા આનંદ થાય છે કે ભારત અને યુનાઇટેડ સ્ટેટ્સ ઑફ અમેરિકા, આપણા બંને રાષ્ટ્રો વચ્ચેના વેપાર અવરોધોને દૂર કરવા માટે વાટાઘાટો ચાલુ રાખી રહ્યા છે."

ટ્રમ્પે મંગળવારે પ્રધાનમંત્રી નરેન્દ્ર મોદીને "ખૂબ જ સારા મિત્ર" તરીકે પણ વર્ણવ્યા અને કહ્યું કે તેઓ "આગામી અઠવાડિયામાં" તેમની સાથે વાત કરવા આતુર છે. તેમણે જણાવ્યું કે, "મને ખાતરી છે કે આપણા બંને મહાન દેશો માટે સફળ નિષ્કર્ષ પર પહોંચવામાં કોઈ મુશ્કેલી નહીં પડે."

ટ્રમ્પનું તાજેતરનું નિવેદન યુએસ પક્ષ તરફથી તાજેતરમાં નરમ પડેલા વાણીક વલણને અનુસરે છે. શુક્રવારે વ્હાઇટ હાઉસમાં એક પ્રેસ કોન્ફરન્સ દરમિયાન, ટ્રમ્પે કહ્યું હતું કે, "હું હંમેશા વડા પ્રધાન મોદીનો મિત્ર રહીશ" અને તેમને "મહાન વડા પ્રધાન" કહ્યા હતા. 27 ઓગસ્ટના રોજ, ટ્રમ્પે યુક્રેન સંઘર્ષ દરમિયાન ભારત દ્વારા રશિયન તેલની ખરીદી ચાલુ રાખવાના પરિણામે, અમેરિકામાં ભારતીય આયાત પર 50 ટકા ટેરિફ લાદ્યો, જે પ્રારંભિક 25 ટકા લેવીને બમણી કરી દીધી.