કેન્દ્રીય કર્મચારીઓને મોદી સરકારની ભેટ, 8મા પગાર પંચને મંજુરી

નવી દિલ્હીઃ કેન્દ્ર સરકારે સરકારી કર્મચારીઓને મોટી ભેટ આપી છે અને કેબિનેટમાં 8મા પગાર પંચને મંજુરી આપી છે. ટૂંક સમયમાં આ માટે એક સમિતિની રચના કરવામાં આવશે અને 8મા પગાર પંચની રચનાની પ્રક્રિયા શરૂ કરવામાં આવશે. આજે પ્રધાનમંત્રી નરેન્દ્ર મોદીના નિવાસસ્થાને કેન્દ્રીય મંત્રીમંડળની બેઠક મળી હતી અને પીએમ મોદીની અધ્યક્ષતામાં આ નિર્ણયને મંજૂરી આપવામાં આવી હતી.

કેન્દ્રીય કર્મચારીઓના સંગઠનોએ આ મુદ્દે કેબિનેટ સચિવને મળીને 8મા પગાર પંચની રચનાની માંગણી કરી હતી અને આ સંગઠનો 8મા પગાર પંચની રચના માટે સરકાર પર સતત દબાણ કરી રહ્યા હતા. છેલ્લા એક વર્ષમાં, કર્મચારી સંગઠનોએ ઘણી વખત કેન્દ્ર સરકારને પરિસ્થિતિ સ્પષ્ટ કરવા માંગ કરી છે. ગત બજેટ પછી જ્યારે નાણા સચિવ ટીવી સોમનાથનને આ અંગે પ્રશ્ન કરવામાં આવ્યો હતો, ત્યારે તેમણે કહ્યું હતું કે અમારી પાસે હજુ પણ આ કામ માટે પૂરતો સમય છે.

દેશમાં 1 જાન્યુઆરી, 2016 થી 7મું પગાર પંચ લાગુ કરવામાં આવ્યું હતું. આનો લાભ લગભગ 1 કરોડ લોકોને મળ્યો. દર 10 વર્ષે પગાર પંચ લાગુ કરવામાં આવતું હોવાથી, હવે એવી અપેક્ષા રાખવામાં આવે છે કે કેન્દ્રની નરેન્દ્ર મોદી સરકાર 1 જાન્યુઆરી, 2026 થી 8મું પગાર પંચ લાગુ કરશે. આનાથી લઘુત્તમ વેતન અને પેન્શનમાં મોટા ફેરફારો થવાની અપેક્ષા છે.

છેલ્લા પગાર પંચની રચના થયાને 10 વર્ષથી વધુ સમય વીતી ગયો છે. સામાન્ય રીતે આગામી પગાર પંચ દર 10 વર્ષે રચાય છે. જૂના પગાર પંચના સ્થાને નવા પગાર પંચની ભલામણોના અમલીકરણ વચ્ચે સામાન્ય રીતે 10 વર્ષનો તફાવત હોય છે. આવી સ્થિતિમાં, આઠમા પગાર પંચની રચના જરૂરી બની ગઈ. પૂર્વ વડા પ્રધાન મનમોહન સિંહના કાર્યકાળ દરમિયાન 28 ફેબ્રુઆરી 2014 ના રોજ સાતમા પગાર પંચની રચના કરવામાં આવી હતી. સાતમા પગાર પંચે લગભગ દોઢ વર્ષ પછી નવેમ્બર 2015માં કેન્દ્ર સરકારને તેની ભલામણો સુપરત કરી હતી. ત્યારબાદ, 1 જાન્યુઆરી, 2016 થી 7મા પગાર પંચની ભલામણો અમલમાં આવી, જે હજુ પણ અમલમાં છે.