મિઝોરમ: આસામ રાઇફલ્સે રૂ. 12.54ની મેથામ્ફેટામાઇન ગોળીઓનો જથ્થો જપ્ત કર્યો

નવી દિલ્હીઃ આસામ રાઇફલ્સે ડ્રગ્સની હેરાફેરી સામેના તેના સતત પ્રયાસોમાં નોંધપાત્ર સફળતા મેળવી છે. આસામ રાઇફલ્સે મિઝોરમના લોંગટલાઈ જિલ્લાના બુઆલપુઈ વિસ્તારમાં એક કાર્યવાહી દરમિયાન 42,000 મેથામ્ફેટામાઇન ગોળીઓ જપ્ત કરી હતી, જેની બજાર કિંમત 12.54 કરોડ રૂપિયા હોવાનું જાણવા મળે છે.

આસામ રાઇફલ્સના પ્રવક્તાએ જણાવ્યું હતું કે ચોક્કસ ગુપ્ત માહિતીના આધારે આ કાર્યવાહી હાથ ધરવામાં આવી હતી. જપ્ત કરાયેલ ડ્રગ્સ વધુ તપાસ અને કાનૂની કાર્યવાહી માટે લોંગટલાઈ જિલ્લાના બુઆલપુઈ પોલીસ સ્ટેશનને સોંપવામાં આવ્યું છે. આ કામગીરી આસામ રાઈફલ્સના ડ્રગ્સની હેરફેરને નાબૂદ કરવા અને વિસ્તારની સુરક્ષા સુનિશ્ચિત કરવાના દૃઢ નિશ્ચયને પ્રતિબિંબિત કરે છે. બીજી તરફ, સુરક્ષા દળોએ મણિપુરના કાકચિંગ અને ઇમ્ફાલ પૂર્વ જિલ્લામાં ખંડણીના આરોપસર પ્રતિબંધિત સંગઠનના એક કાર્યકર સહિત ત્રણ લોકોની ધરપકડ કરી હતી. આ કાર્યવાહી દરમિયાન હથિયારો અને દારૂગોળો પણ મળી આવ્યો હતો.

પોલીસના જણાવ્યા અનુસાર, મંગળવારે કાકચિંગ જિલ્લાના આહંગ ગામમાંથી પ્રતિબંધિત PRAPAK-PRO સંગઠનના એક કાર્યકરની ધરપકડ કરવામાં આવી હતી. તે કાકચિંગ જિલ્લાના વાંગુ ચેરેલ અને પંગલતાબી વિસ્તારોમાં ખંડણીની પ્રવૃત્તિઓમાં સામેલ હતો. તેવી જ રીતે, ઇમ્ફાલ પશ્ચિમ જિલ્લાના સેકમાઈ વિસ્તારમાં ભૂગર્ભ સંગઠનોને પરિવહન વાહનો પાસેથી પૈસા પડાવવામાં મદદ કરનારા બે વ્યક્તિઓની ઇમ્ફાલ પૂર્વ જિલ્લાના વાંગખેઈ વિસ્તારમાંથી ધરપકડ કરવામાં આવી હતી.

આ ઉપરાંત, ઇમ્ફાલ પશ્ચિમ જિલ્લાના સાજીરોકમાં સર્ચ ઓપરેશન દરમિયાન પાંચ હથિયારો અને દારૂગોળોનો જથ્થો પણ જપ્ત કરવામાં આવ્યો હતો. જપ્ત કરાયેલા હથિયારોમાં એક SLR (સિંગલ લોડ રાઇફલ) અને તેનું મેગેઝિન, એક સિંગલ બેરલ ગન, ત્રણ 9 mm પિસ્તોલ, ત્રણ મેગેઝિન, મોટી માત્રામાં દારૂગોળો, એક હેન્ડ ગ્રેનેડ, ચાર સ્મોક ગ્રેનેડ અને અન્ય સામગ્રીનો સમાવેશ થાય છે.