અમેરિકાના સૈન્ય વિસ્ફોટક પ્લાન્ટમાં ભીષણ બ્લાસ્ટ

અમેરિકાના ટેનેસીમાં એક સૈન્ય વિસ્ફોટક પ્લાન્ટમાં જોરદાર વિસ્ફોટ થયો છે. આ વિનાશક વિસ્ફોટમાં 19 લોકોના મોત થયા હોવાની કે ગુમ થયા હોવાની માહિતી સામે આવી રહી છે. ન્યૂઝ એજન્સી સિન્હુઆએ અમેરિકન મીડિયાના હવાલાથી જણાવ્યું કે, હમ્ફ્રીઝ કાઉન્ટીના શેરિફ ક્રિસ ડેવિસે શુક્રવારે બપોરે એક પ્રેસ કોન્ફરન્સમાં કહ્યું, "હું તમને જણાવી શકું છું કે 19 લોકો ગુમ છે."

મીડિયા સાથેની વાતચીત દરમિયાન, ડેવિસે આ ઘટનાને "અત્યાર સુધી જોયેલી સૌથી વિનાશક" જગ્યાઓમાંથી એક ગણાવી અને કહ્યું, "આના વિશે જણાવવા માટે કંઈ બચ્યું નથી, અહીં બધું સમાપ્ત થઈ ગયું છે." તેમણે કહ્યું કે વિસ્ફોટનો કાટમાળ અડધા ચોરસ માઈલમાં ફેલાયેલો છે. પીડિત પરિવારો પર દુઃખનો પહાડ તૂટી પડ્યો છે. મામલાની તપાસ શરૂ કરી દેવામાં આવી છે અને વિસ્ફોટનું કારણ જાણવાના પ્રયાસો ચાલી રહ્યા છે.

ડેવિસે વધુમાં જણાવ્યું કે તપાસમાં થોડો સમય લાગી શકે છે. આ મામલા સાથે સંબંધિત ઘણી એજન્સીઓ મળીને શું થયું તે જાણવાનો પ્રયાસ કરી રહી છે. ડેવિસે  એક પ્રેસ કોન્ફરન્સમાં કહ્યું કે આ વિસ્ફોટ સ્થાનિક સમય અનુસાર સવારે લગભગ 7:45 વાગ્યે થયો હતો. કેટલાક લોકો માર્યા ગયા છે. હિકમેન કાઉન્ટીના મેયર જિમ બેટ્સે શુક્રવારે એબીસી ન્યૂઝને જણાવ્યું કે ઓછામાં ઓછા 13 લોકોનો કોઈ પત્તો લાગી શક્યો નથી.

શેરિફ કાર્યાલયે જણાવ્યું કે ઘણી એજન્સીઓ ઘટનાસ્થળે પહોંચી ગઈ છે અને આગનું આંકલન કરીને તેને નિયંત્રિત કરવા માટે કામ કરી રહી છે. તેમણે એ પણ કહ્યું છે કે બીજા વિસ્ફોટોની આશંકાને કારણે એજન્સીઓ હાલમાં તે વિસ્તારમાં જવાનું ટાળી રહી છે. ડેવિસે જણાવ્યું કે વિસ્ફોટ પછીની ઘટનાની તપાસમાં આલ્કોહોલ, તમાકુ, ફાયરઆર્મ અને વિસ્ફોટક બ્યુરો, હોમલેન્ડ સુરક્ષા અને ટેનેસી બ્યુરો ઑફ ઇન્વેસ્ટિગેશન જેવી એજન્સીઓ સામેલ છે.