ક્રિકેટના મેદાનમાં વારંવાર અપીલ કરવા મામલે પાકિસ્તાનના કેપ્ટન મુદ્દે શું કહ્યું ઈશાન કિશને જાણો...

મુંબઈઃ ભારતીય ક્રિકેટર ઈશાન કિશન અને ભૂતપૂર્વ આંતરરાષ્ટ્રીય અમ્પાયર અનિલ ચૌધરીનો એક વીડિયો વાયરલ થઈ રહ્યો છે. ખરેખર, ચૌધરીએ સોશિયલ મીડિયા પર એક વીડિયો ક્લિપ શેર કરી છે, જેમાં ઇશાન કિશન સાથેની તેમની વાતચીત ચર્ચાનો વિષય બની છે. કિશને IPL 2025 ની પોતાની પહેલી જ મેચમાં 106 રન બનાવીને જોરદાર સદી ફટકારી હતી. આ વાયરલ વીડિયોમાં, તેણે પાકિસ્તાની વિકેટકીપર અને પાકિસ્તાન ODI ટીમના કેપ્ટન મોહમ્મદ રિઝવાન પર પણ કટાક્ષ કર્યો છે, જે વિકેટકીપિંગ દરમિયાન ખૂબ જ અપીલ કરે છે.

અનિલ ચૌધરીએ કિશનની પ્રશંસા કરતા કહ્યું કે તે હવે એક પરિપક્વ ખેલાડી બની ગયો છે. આ સાથે તેમણે એ પ્રશ્ન પણ પૂછ્યો કે પહેલા ઇશાન વિકેટકીપિંગ કરતી વખતે ઘણી અપીલ કરતો હતો પણ હવે તે એવું નથી કરતો. ચૌધરીએ પૂછ્યું કે આ પરિવર્તન કેવી રીતે આવ્યું? ઈશાન કિશને રમુજી રીતે જવાબ આપતા કહ્યું કે, "મને લાગે છે કે અમ્પાયરો સ્માર્ટ બની ગયા છે. જો આપણે દર વખતે અપીલ કરીએ, તો અમ્પાયર આઉટ માટે પણ નોટ-આઉટ આપશે. એકવાર કરવું વધુ સારું છે, જ્યારે પણ યોગ્ય હોય ત્યારે અપીલ કરો, તમને પણ વિશ્વાસ થશે કે આપણે યોગ્ય સમયે અપીલ કરી છે. નહીંતર, જો હું હવે મોહમ્મદ રિઝવાન જેવું કંઈક કરીશ, તો તમે એક વાર પણ આઉટ નહીં આપો."

ઈશાન કિશન હાલમાં શાનદાર ફોર્મમાં છે. રાજસ્થાન રોયલ્સ સામેની મેચમાં તેણે અણનમ 106 રનની તોફાની ઇનિંગ રમી હતી. આ ઇનિંગમાં તેણે 11 ચોગ્ગા અને 6 છગ્ગા ફટકાર્યા. અગાઉ, SRH એ એક ઇન્ટ્રા-સ્ક્વોડ મેચનું આયોજન કર્યું હતું, તેમાં પણ કિશનએ તોફાની બેટિંગ કરી હતી. કિશન તેની આઈપીએલ કારકિર્દીમાં 3,000 રન પૂરા કરવાની ખૂબ નજીક છે. આ માટે તેણે 250 વધુ રન બનાવવા પડશે.