ખાલિસ્તાની ઉગ્રવાદીઓ હવે કેનેડિયનોને નિશાન બનાવે છે, કહે છે- યુકે અને યુરોપ પાછા જાઓ

ખાલિસ્તાન સમર્થકો અને અલગતાવાદીઓ, જેઓ પહેલા ભારતને નિશાન બનાવતા હતા, તેઓ હવે કેનેડાના ગોરા નાગરિકોને તેમના નવા દુશ્મન માની રહ્યા છે. સોશિયલ મીડિયા પર એક વીડિયો વાયરલ થયો છે, જેમાં એક કથિત ખાલિસ્તાન સમર્થક કેનેડિયન નાગરિકોને 'આક્રમણખોરો' કહે છે અને તેમને ઈંગ્લેન્ડ અને યુરોપ પાછા જવાનું કહે છે.

શોભાયાત્રા દરમિયાન વીડિયો શૂટ

માઇક્રોબ્લોગિંગ સાઇટ X પર બે મિનિટનો આ વીડિયો કેનેડાના બ્રિટિશ કોલંબિયાના સરે વિસ્તારમાં 'નગર કીર્તન' શોભાયાત્રા દરમિયાન શૂટ કરવામાં આવ્યો હતો. આ વીડિયોમાં બતાવવામાં આવ્યું છે કે, શોભાયાત્રામાં ઘણા લોકો આગળ વધી રહ્યા છે, જ્યારે પાછળથી એક ગીત વાગી રહ્યું છે. આ દરમિયાન કેટલાક લોકો ખાલિસ્તાનના કહેવાતા ઝંડા લહેરાતા પણ જોઈ શકાય છે. આ વીડિયો બનાવનાર વ્યક્તિ 'લાઈક્સ અને શેર'ની માંગ કરી રહ્યો છે અને ભડકાઉ નારા પણ લગાવી રહ્યો છે. વિડિયોમાં તે કહેતા સાંભળી શકાય છે કે, ‘ગોરા લોકો આક્રમણકારો છે' અને 'અમે કેનેડાના હકદાર માલિક છીએ.' તે પછી તે ગોરા કેનેડિયનો 'ઈંગ્લેન્ડ અને યુરોપ પાછા જવા' વિશે વાત કરે છે.

X પર વિડીયો વાયરલ થઈ રહ્યો છે

તે આગળ કહે છે કે, આ કેનેડા આપણો દેશ છે. તમે પાછા જાઓ. આ શોભાયાત્રાનો વીડિયો ડેનિયલ બોર્ડમેન નામના યુઝરે એક્સ (અગાઉ ટ્વિટર) પર પોસ્ટ કર્યો હતો. જેની સાથે તેણે લખ્યું - 'ખાલિસ્તાનીઓ સરેમાં કૂચ કરી રહ્યા છે, દાવો કરે છે કે 'અમે કેનેડાના માલિક છીએ' અને 'શ્વેત લોકોએ યુરોપ અને ઇઝરાયેલ પાછા જવું જોઈએ.' અમે કેવી રીતે આ મૂર્ખ લોકોને અમારી વિદેશ નીતિ નક્કી કરવાની મંજૂરી આપીએ છીએ?