પાકિસ્તાનમાં જાફર એક્સપ્રેસ ફરી એકવાર આતંકવાદનો ભોગ બન્યું...

પાકિસ્તાનના જેકોબાદ નજીક રેલ્વે ટ્રેક પર એક મોટો વિસ્ફોટ થયો છે, જેના કારણે જાફર એક્સપ્રેસના 6 કોચ પાટા પરથી ઉતરી ગયા છે. આ ટ્રેન પેશાવરથી ક્વેટા જઈ રહી હતી. પોલીસના જણાવ્યા અનુસાર, વિસ્ફોટથી રેલ્વે ટ્રેક પર ત્રણ ફૂટ પહોળો ખાડો પડ્યો હતો અને લગભગ છ ફૂટ લાંબો ટ્રેક સંપૂર્ણપણે નાશ પામ્યો હતો. જોકે, રાહતની વાત એ છે કે આ અકસ્માતમાં કોઈ જાનહાની થઈ નથી. રેલ્વે અને સુરક્ષા એજન્સીઓ ઘટનાસ્થળે દોડી ગઈ હતી.

રિપોર્ટ અનુસાર, વિસ્ફોટ એટલો જોરદાર હતો કે કોચના પૈડા પાટા પરથી ઉતરી ગયા અને ટ્રેન અચાનક અટકી ગઈ હતી. પ્રારંભિક અહેવાલોમાં કહેવામાં આવ્યું છે કે આ અકસ્માતમાં ઘણા મુસાફરો ઘાયલ થયા છે, જોકે અત્યાર સુધી કોઈના મૃત્યુની પુષ્ટિ થઈ નથી. રાહત અને બચાવ ટીમો તાત્કાલિક ઘટનાસ્થળે પહોંચી ગઈ છે અને ઘાયલોને નજીકની હોસ્પિટલોમાં દાખલ કરવામાં આવી રહ્યા છે. જેકોબાદ નજીક જાફર એક્સપ્રેસમાં થયેલા વિસ્ફોટથી ફરી એકવાર આ રૂટની સુરક્ષા પર સવાલો ઉભા થયા છે. આ ટ્રેન પહેલા પણ ઘણી વખત હુમલાઓનો ભોગ બની ચૂકી છે. બલુચિસ્તાનને રેલ મુસાફરી માટે અસુરક્ષિત માનવામાં આવે છે. આ પ્રદેશ લાંબા સમયથી અલગતાવાદ, હિંસા અને સેના સામે બળવો સામે સંઘર્ષ કરી રહ્યો છે. આ વર્ષે માર્ચમાં, બલૂચ લિબરેશન આર્મી (BLA) એ જાફર એક્સપ્રેસનું અપહરણ કર્યું હતું. તે સમયે, ટ્રેનમાં લગભગ 350 મુસાફરો હતા. પાકિસ્તાની સેનાએ ઓપરેશન હાથ ધરીને ખૂબ જ મુશ્કેલીથી ટ્રેનને બચાવી હતી, પરંતુ BLA એ દાવો કર્યો હતો કે તેમણે 100 થી વધુ પાકિસ્તાની સૈનિકોને મારી નાખ્યા છે. જોકે, પાકિસ્તાની સેનાએ 35 બંધકોના મોતનો સ્વીકાર કર્યો હતો.